حکومت نے آئی ایم ایف کی ایک اور بڑی شرط پوری کر دی

موٹر وہیکلز انڈسٹری ڈویلپمنٹ بل 2025ء قائمہ کمیٹی سے منظور

منگل 9 ستمبر 2025 20:58

اسلام آباد (اُردو پوائنٹ اخبارتازہ ترین - این این آئی۔ 09 ستمبر2025ء)حکومت نے آئی ایم ایف کی ایک اور بڑی شرط پوری کر دی۔ موٹر وہیکلز انڈسٹری ڈیویلپمنٹ بل 2025 قائمہ کمیٹی سے منظور کرلیا گیا، پاکستان میں آٹو موبائل مارکیٹ کا حجم 600 ارب سے تجاوز کرگیا۔ بل کے مطابق گاڑیوں کی مینوفیکچرنگ اور درآمدات کو ریگولیٹ کیا جائے گا، کار مینوفیکچرز کو سیفٹی قوانین پر عمل درآمد یقینی بنانا ہوگا، درآمدی گاڑیوں پرسیفٹی اسٹینڈرز پرعمل درآمد کرایا جائے گا۔

وزارت صنعت حکام کے مطابق سیفٹی قوانین پرعمل آئی ایم ایف کا بینچ مارک ہے، آئی ایم ایف کی شرائط کے مطابق قانون جلد نافذ کیا جائے گا، قوانین کی خلاف ورزری پر 20 لاکھ جرمانہ، 3 سال قید کی سزا تجویز کیا گیا ہے۔ اون منی، زائد قیمت سمیت صارفین کا استحصال روکا جائے گا، بل کی منظوری کا مقصد انسانی جانوں کا ضیاع روکنا ہے، بیرون ملک سے گاڑی درآمد کرنے سے پہلے معیار چیک کیا جائے گا۔

(جاری ہے)

کمیٹی اجلاس میں غیر معیاری گاڑیوں کیخلاف ارکان پارلیمنٹ نے شکایات کے انبار لگا دیئے، گاڑیوں میں ایئر بیگ سمیت بنیادی سیفٹی فیچرز کا فقدان تشویشناک قرار دیدیا گیا۔وزارت صنعت حکام نے کہا کہ ملک میں 107 مینوفیکچرز اور اسملبرز کام کر رہے ہیں، پاکستان میں سالانہ اوسطا 18 لاکھ گاڑیاں تیار ہو رہی ہیں، حکومت پاکستان اب تک 17 ریگولیشنز اختیار کر چکی ہے۔