ڈپٹی چیئرمین سینیٹ سیدال خان کی وزیراعظم کے مشیر برائے سیاسی امور رانا ثناء اللہ کو سینیٹر منتخب ہونے پر مبارکباد

بدھ 10 ستمبر 2025 21:40

اسلام آباد (اُردو پوائنٹ اخبارتازہ ترین - اے پی پی۔ 10 ستمبر2025ء) ڈپٹی چیئرمین سینیٹ سیدال خان نے وزیراعظم کے مشیر برائے سیاسی امور رانا ثناء اللہ کو سینیٹر منتخب ہونے پر دلی مبارکباد پیش کی ہے،رانا ثناء اللہ کا انتخاب نہ صرف ان کی طویل سیاسی جدوجہد اور عوامی خدمات کا اعتراف ہے بلکہ یہ ایوانِ بالا کے لئے بھی ایک خوش آئند اضافہ ہے۔بدھ کو سینیٹ سیکرٹریٹ سے جاری اپنے تہنیتی پیغام میں سیدال خان نے کہا کہ رانا ثناء اللہ ایک باصلاحیت، ذہین اور متحرک پارلیمنٹیرین ہیں جنہوں نے سیاست کے ہر میدان میں اپنی قائدانہ صلاحیتوں اور ثابت قدمی سے نمایاں مقام حاصل کیا، ان کی عملی سیاست ہمیشہ عوامی خدمت، جمہوریت کے استحکام اور قانون کی بالادستی کے گرد گھومتی رہی ہے۔

ڈپٹی چیئرمین سینیٹ نے اس امید کا اظہار کیا کہ نومنتخب سینیٹر اپنی نئی ذمہ داریوں کو دیانتداری اور انتھک محنت سے نبھائیں گے، ان کا وسیع سیاسی اور پارلیمانی تجربہ ایوانِ بالا کے لئے قانون سازی کے عمل کو مزید مؤثر اور نتیجہ خیز بنانے کے ساتھ ساتھ عوامی مفاد کے معاملات میں قیمتی رہنمائی فراہم کرے گا۔

(جاری ہے)

انہوں نے کہا کہ رانا ثناء اللہ کی موجودگی نہ صرف ایوان کی فعالیت اور کارکردگی میں اضافہ کرے گی بلکہ جمہوری اقدار کے فروغ اور قومی مفاد کے تحفظ میں بھی نمایاں کردار ادا کرے گی۔

ڈپٹی چیئرمین سینیٹ سیدال خان نے آخر میں نومنتخب سینیٹر کے لئے نیک خواہشات کا اظہار کرتے ہوئے دعا کی کہ اللہ تعالیٰ انہیں اپنی نئی ذمہ داریوں کی ادائیگی میں کامیاب فرمائے اور ملک و قوم کی ترقی و خوشحالی کے لئے ان کی کاوشوں کو بارآور بنائے۔