برادر ملک قطر کے ساتھ ہیں، اسرائیلی حملوں کی مذمت کرتے ہیں‘ سعودی ولی عہد

جمعرات 11 ستمبر 2025 22:38

ریاض(اُردو پوائنٹ اخبارتازہ ترین - آن لائن۔ 11 ستمبر2025ء)سعودی ولی عہد محمد بن سلمان کا کہنا ہے کہ خطے میں اسرائیلی حملوں کی مذمت کرتے ہیں، ہم برادر ملک قطر کے ساتھ ہیں۔ریاض میں مجلسِ شوریٰ کونسل کے سالانہ اجلاس سے خطاب کرتے ہوئے سعودی ولی عہد نے کہا کہ قطر کی جانب سے کیے جانے والے ہر اقدام میں اس کے ساتھ کھڑے ہیں۔

(جاری ہے)

سعودی ولی عہد محمد بن سلمان سعودی وژن 2030ء پر تیزی سے گامزن ہیں، وژن 2030ء سے سعودی عرب تیزی سے ترقی کرتی ہوئی معیشت کے طور پر دنیا کے سامنے آیا ہے۔

انہوں نے کہا کہ مملکت کی ترقی اور خوش حالی کے لیے پالیسیوں کو مرتب کیا جا رہا ہے، فیصلہ سازی کے ذریعے دنیا کے ساتھ مل کر آگے بڑھ رہے ہیں۔واضح رہے کہ گزشتہ روز اسرائیل نے قطر کے دارالحکومت دوحہ پر فضائی حملہ کردیا، جس میں حماس کے رہنماؤں کی رہائش گاہوں کو نشانہ بنایا گیا۔