Live Updates

ذخیرہ اندوزوں کے خلاف کارروائیوں سے گندم کی فی من قیمت میں 800روپے کمی ہوئی ‘ سلمیٰ بٹ

جمعہ 12 ستمبر 2025 12:52

لاہور(اُردو پوائنٹ اخبارتازہ ترین - این این آئی۔ 12 ستمبر2025ء) وزیر اعلیٰ پنجاب کی معاون خصوصی سلمیٰ بٹ نے کہا ہے کہ ذخیرہ اندوزوں کے خلاف شکنجہ سخت کرنے کے بعد گندم کی فی من قیمت میں 800 روپے کمی ہوئی ہے ۔ اپنے بیان میں انہوںنے کہا کہ سیلاب کی آڑ میں منصوعی قلت پیدا کرنے والوں سے سختی سے نمٹا جا رہا ہے، پنجاب میں گندم کی کوئی قلت نہیں، اگلے سال تک کا اسٹاک موجود ہے۔

(جاری ہے)

سلمی بٹ نے کہا کہ سیلاب کا گندم کی قیمتوں میں اضافے سے کوئی لینا دینا نہیں، سیلاب کی آڑمیں گندم وآٹے کی قیمتوں میں مصنوعی اضافہ کیا گیا، انہوں نے کہا کہ ڈکلیئراسٹاک آئندہ فصل آنے تک پنجاب کے لئے کافی ہے، ذخیرہ اندوزوں کے خلاف کاروائی کر کے اڑھائی لاکھ ٹن گندم برآمد کی جا چکی ہے، وزیراعلی کے نوٹس اور کارروائیوں کے بعد فی من گندم800روپے کم ہوئی، وزیراعلی کی ڈیڈلائن ختم ہوتے ہی کاروائیاں مزید تیز کریں گے۔