وانا جنوبی وزیرستان میں تاریخی یوتھ کنونشن کا انعقاد، ترقی اور تعلیم کے عزم کا اعادہ

جمعہ 12 ستمبر 2025 12:58

وانا (اُردو پوائنٹ اخبارتازہ ترین - اے پی پی۔ 12 ستمبر2025ء) جنوبی وزیرستان میں فرنٹیئر کور خیبرپختونخوا (ساوتھ) کے زیرِ اہتمام ایک شاندار یوتھ کنونشن کا انعقاد کیا گیا، شرکاء نے علاقے کی سماجی و تعلیمی ترقی کے لیے اپنے عزم کا اظہار کیا۔ انسپکٹر جنرل ایف سی (ساوتھ) تقریب کے مہمانِ خصوصی تھے ۔تفصیلات کے مطابق تقریب میں نوجوانوں، اساتذہ، خواتین اور قبائلی عمائدین کی بڑی تعداد نے شرکت کی ۔

کنونشن کے شرکاء نے تعلیم، کھیلوں اور فلاحی سرگرمیوں کے ذریعے اپنی صلاحیتوں کو بروئے کار لانے اور مستقبل کو تابناک بنانے کا عہد کیا۔ تقریب کے دوران مختلف شعبوں میں نمایاں کارکردگی دکھانے والوں کو اعزازات سے نوازا گیا۔انسپکٹر جنرل ایف سی (ساوتھ) نے اعلان کیا کہ انگور اڈہ بارڈر ٹرمینل کو 30 ستمبر 2025 تک تجارت کے لیے دوبارہ کھول دیا جائے گا۔

(جاری ہے)

انہوں نے مزید کہا کہ ہونہار طلباء کو آرمی چیف ایجوکیشن پیکیج کے تحت ملک بھر کے آرمی پبلک اسکولز میں تعلیمی مواقع فراہم کیے جائیں گے۔ اس کے علاوہ، نوجوانوں کے لیے ڈیجیٹل سکلز کورسز اور طلباء و طالبات کے لیے ایک گرینڈ اسپورٹس فیسٹیول کے انعقاد کا بھی اعلان کیا گیا۔مقامی شرکاء نے پاک فوج اور ایف سی ساوتھ کی جانب سے خواتین کی تعلیم، فلاحی منصوبوں اور انفراسٹرکچر کی بہتری کے لیے کی جانے والی کوششوں کو سراہا اور مکمل تعاون کی یقین دہانی کرائی۔ یہ کنونشن علاقے میں ترقی، تعلیم اور مثبت سرگرمیوں کے فروغ کے لیے ایک سنگِ میل ثابت ہوا۔