پشاور، تھانہ فقیر آباد پولیس کی کارروائی، دوہرے قتل میں ملوث ملزم 24 گھنٹوں کے اندر اندر گرفتار، آلہ قتل برآمد

ہفتہ 13 ستمبر 2025 13:52

پشاور (اُردو پوائنٹ اخبارتازہ ترین - اے پی پی۔ 13 ستمبر2025ء) پشاور کے ایس ایچ او تھانہ فقیر آباد عاکف انجم نے کامیاب کارروائی کرتے ہوئے دوہرے قتل میں ملوث ملزم کو 24 گھنٹوں کے اندر گرفتار کرلیا۔ پولیس کے مطابق ملزم میر افضل کی ہتھ ریڑی کے تنازعے پر مقتولین رحیم گل اور نعمت خان کے ساتھ زبانی تکرار ہوئی جس پر اس نے فائرنگ کرکے دونوں کو قتل کردیا۔

ابتدائی تفتیش کے دوران اس نے اپنے جرم کا اعتراف کرتے ہوئے اسے زبانی تکرار کا شاخسانہ قرار دیا۔ ملزم کے قبضے سے آلہ قتل پستول بھی برآمد کرلیا گیا ہے،مزید تفتیش جاری ہے۔ تفصیلات کے مطابق مدعی حمید گل ولد ثنا گل نے تھانہ فقیر آباد پولیس کو اپنے بھائی مقتول رحیم گل اور نعمت گل کے قتل کی رپورٹ درج کرائی جس پر تفتیش شروع کردی گئی۔

(جاری ہے)

ایس پی فقیر آباد ڈویژن نے دوہرے قتل کا سختی سے نوٹس لیتے ہوئے ڈی ایس پی فقیر آباد سرکل کی نگرانی میں ایس ایچ او تھانہ فقیر آباد پر مشتمل خصوصی ٹیم تشکیل دی۔ ایس ایچ تھانہ فقیر آباد نے دیگر نفری کے ہمراہ کامیاب کارروائی کے دوران واقعے میں ملوث ملزم میر افضل سکنہ قاضی کلے کا 24 گھنٹوں کے اندر اندر سراغ لگا کر گرفتار کرلیا۔ ملزم نے ابتدائی تفتیش کے دوران دوہرے قتل میں ملوث ہونے کا اعتراف کرتے ہوئے واقعے کو زبانی تکرار کا شاخسانہ قرار دیا،اس سے مزید تفتیش جاری ہے۔