بھارت، ریاست بہار میں باوردی فوجی مراعات کے لیے سڑکوں پر نکل آئے،ملک گیر احتجاج کی دھمکی

ہفتہ 13 ستمبر 2025 14:45

پٹنہ (اُردو پوائنٹ اخبارتازہ ترین - اے پی پی۔ 13 ستمبر2025ء) بھارتی ریاست بہار میں بڑی تعداد میں فوجیوں نے اپنی ضروریات اور مراعات کے لیے سڑکوں پر نکل کر زبردست احتجاج کیا،انہوں نے دھمکی دی کہ اگر ان کے مطالبات پورے نہ کیے گئے تو احتجاج کا دائرہ پورے ملک تک پھیلا دیا جائے گا۔ کشمیر میڈیاسروس کے مطابق باقاعدہ وردی میں ملبوس فوجیوں نے ضروریات اور مراعات کی عدم فراہمی کے خلاف سڑکوں پر مارچ کیا ۔

انہوں نے بھارتی ترنگا اور بینر اٹھا رکھے تھے ۔ احتجاج میں شریک فوجیوں نے اپنے مطالبات کے حق میں نعرے لگائے ۔فوجیوں کا کہنا تھا کہ انہیں ضروریات اور مراعات سے مسلسل محروم رکھا جارہا ہے جس کی وجہ سے وہ سخت مشکلات کا شکار ہیں۔ احتجاجی فوجیوں نے دھمکی دی کہ اگر حکومت نے ان کے مطالبات فوری طور پورے نہ کیے تو ملک بھر میں احتجاج کیا جائے گا ۔

(جاری ہے)

فوجیوں نے ”ہماری مانگیں پوری کرو پوری کرو، مودی سرکار ہوش میں آ ہوش میں آﺅ“جیسے نعرے لگائے۔انہوں نے اس موقع پر ذرائع ابلاغ کے نمائندوں کو بتایا”ہمیں ایک پیسہ بھی الائونس نہیں مل رہا ، ہم وزیر اعظم، وزیر داخلہ ، وزیر دفاع کو خط لکھ لکھ کر تھک چکے ہیں لیکن کوئی ہماری نہیں سن رہا لہذا ہم احتجاج پر مجبور ہوئے ہیں۔یہ دنیا کا انوکھا واقعہ ہے کہ باقاعدہ وردی میں ملبوس کسی ملک کے فوجی مراعات اور دیگر ضروریات نہ ملنے پر حکومت کے خلاف سڑکوں پر نکل آئے ہیں۔