محکمہ داخلہ کے ایئر لفٹ ڈرونز دور دراز اور ناقابلِ رسائی علاقوں میں پھنسے افراد کو تلاش کر کے کھانا اور ادویات پہنچا رہے ہیں،ترجمان محکمہ داخلہ پنجاب

لاہور (اُردو پوائنٹ اخبارتازہ ترین - اے پی پی۔ 13 ستمبر2025ء) وزیراعلی پنجاب کی ہدایت پر پاکستان میں اپنی طرز کا پہلا ایئر لفٹ ڈرون ریسکیو اینڈ ریلیف آپریشن جاری ہے۔ تفصیلات کے مطابق جنوبی پنجاب کے سیلاب متاثرہ اضلاع میں محکمہ داخلہ کے ایئر لفٹ ڈرونز دور دراز اور ناقابلِ رسائی علاقوں میں پھنسے افراد کو تلاش کر کے کھانا اور ادویات پہنچا رہے ہیں۔

ترجمان محکمہ داخلہ پنجاب کے مطابق جن متاثرہ علاقوں اور مقامات تک کشتیوں سے رسائی ممکن نہیں وہاں ڈرونز سے بیک وقت 200کلوگرام تک خوراک، ادویات اور امداد پہنچائی جا رہی ہے۔ ڈاکٹر احمد جاوید قاضی اور ڈائریکٹر سول ڈیفنس راو تسنیم علی خان متاثرہ علاقوں میں خود جاکر ڈرون ریلیف آپریشن کی نگرانی کر رہے ہیں۔انہوں نے بتایا کہ جنوبی پنجاب میں جاری ریسکیو اینڈ ریلیف آپریشن پاکستان میں جدید ٹیکنالوجی کے استعمال سے اپنی طرز کا پہلا آپریشن ہے۔

(جاری ہے)

انہوں نے بتایا کہ جدید ٹیکنالوجی کی بدولت سول ڈیفنس پنجاب سیلاب میں پھنسے افراد کیلئے امید کی کرن بن گیا ہے اور 50کلومیٹر سے زائد فاصلے پر پھنسے افراد کو ڈرون کی مدد سے خوارک اور ادویات پہنچائی جا چکی ہیں۔ ترجمان نے بتایا کہ سول ڈیفنس پنجاب ڈرونز کی مدد سے سیلاب میں پھنسے افراد کو دور دراز علاقوں میں تلاش کر رہا ہے۔ ایئر لفٹ ڈرونز ایک وقت میں 200کلوگرام تک وزنی شخص یا سامان کو اٹھا کر محفوظ طریقے سے مطلوبہ مقام تک پہنچانے کی صلاحیت رکھتے ہیں۔

ترجمان نے بتایا کہ ایسے دور دراز علاقے جہاں کشتیوں سے رسائی ممکن نہیں وہاں ڈرونز کی مدد سے امداد پہنچائی جا رہی ہے۔ انہوں نے بتایا کہ سیلاب متاثرین کیلئے ریسکیو اینڈ ریلیف آپریشن دن رات مستقل جاری ہے اور سیکرٹری داخلہ پنجاب اور ڈائریکٹر سول ڈیفنس پنجاب را تسنیم علی خان متاثرہ علاقوں میں جاکر خود ریلیف آپریشن کی نگرانی کر رہے ہیں۔

انہوں نے بتایا کہ یہ پاکستان میں اپنی طرز کا پہلا ریسکیو اینڈ ریلیف آپریشن ہے جس میں ڈرونز کی مدد سے ناقابل رسائی اور خطرناک مقامات سے انسانوں کو محفوظ انداز میں ایئرلفٹ کیا جاسکتا ہے۔ انہوں نے بتایا کہ وزیراعلی پنجاب نے 10مزید ایئر لفٹ ڈرونز کی فوری خریداری کی ہدایت کی ہے۔ پنجاب سول ڈیفنس کے تربیت یافتہ اہلکار اور رضاکار سیلاب سے متاثرہ علاقوں میں قیمتی انسانی جانیں بچانے کیساتھ ہرممکن امداد فراہم کر رہے ہیں۔ انہوں نے بتایا کہ پنجاب کے تمام متعلقہ محکمے اور افسران 24 گھنٹے فیلڈ میں متاثرین کی امداد میں مصروف ہیں۔