ْٹک ٹاک لائیو چیٹ پر پابندی عائد کرنے کے مطالبے کی قرارداد پنجاب اسمبلی سیکرٹریٹ میں جمع

اتوار 14 ستمبر 2025 13:25

لاہور(اُردو پوائنٹ اخبارتازہ ترین - این این آئی۔ 14 ستمبر2025ء) سماجی ویب سائٹ ٹک ٹاک لائیو چیٹ پر پابندی عائد کرنے کے مطالبے کی قرارداد پنجاب اسمبلی سیکرٹریٹ میں جمع کرا دی گئی ۔

(جاری ہے)

رکن اسمبلی فرخ جاوید کی جانب سے جمع کرائی گئی قراردادکے متن میں کہا گیا ہے کہ پاکستان میں آج کل ٹک ٹاک مافیا لائیو چیٹ کے ذریعے فحاشی و عریانی کو فروغ دے رہا ہے، جس کے ذریعے نوجوان نسل خاص طور پر بچوں کو بے حیائی کی طرف راغب کیا جا رہا ہے، نوجوان لڑکے لڑکیاں آپس میں فحش گفتگو کرتے ہیں،نوجوان لڑکے لڑکیاں ایک دوسرے کو غلط حرکات کرنے کا کہتے ہیں۔

قرارداد کے متن میں کہا گیا ہے کہ یہ عمل ہمارے اسلامی معاشرے کے لئے کبھی بھی قابل برداشت نہیں، نوجوان نسل سستی شہرت اور پیسے کی خاطر دھڑا دھڑ ٹک ٹاک کی جانب راغب ہو رہے ہیں، وفاقی حکومت سے مطالبہ ہے کہ ٹک ٹاک پر لائیو چیٹ پر فوری پابندی عائد کی جائے تاکہ نوجوان نسل کو تباہی سے بچایا جا سکے۔