Live Updates

پاکستان کے لیے مسیحی برادری کا کردار ہمیشہ سے مثالی رہا ہے‘رمیش سنگھ اروڑہ

مسیحی برادری کو تحفظ فراہم کرنا حکومت پنجاب کی ترجیحات میں شامل ہے‘صوبائی وزیر اقلیتی امور

اتوار 14 ستمبر 2025 17:05

اوکاڑہ (اُردو پوائنٹ اخبارتازہ ترین - این این آئی۔ 14 ستمبر2025ء)مسیحی برادری کے زیر اہتمام جناح سٹیڈیم اوکاڑہ میں پر وقار دعائیہ تقریب کا انعقاد کیا گیا جس میں صوبائی وزیر اقلیتی امور رمیش سنگھ اروڑہ نے ممبر صوبائی اسمبلی چوہدری غلام رضا ربیرہ کے ہمراہ خصوصی طور پر شرکت کی۔صوبائی وزیرِ اقلیتی امور رمیش سنگھ اروڑہ نے اپنے خطاب میں کہا کہ پاکستان کے لیے مسیحی برادری کا کردار ہمیشہ سے مثالی رہا ہے جبکہ مسیحی برادری کو تحفظ فراہم کرنا حکومت پنجاب کی ترجیحات میں شامل ہے، وزیراعلیٰ پنجاب مریم نواز شریف نے اکثریت اور اقلیت میں کبھی کوئی فرق نہیں رکھا، انہوں نے کہا کہ مسیحی برادری میں مینارٹی کارڈز کی تقسیم حکومت پنجاب کا انقلابی اقدام ہے، مینارٹی کارڈز کے ذریعے 75 ہزار خاندانوں کو ہر تین ماہ بعد 10 ہزار روپے فراہم کیے جا رہے ہیں، صوبائی وزیر اقلیتی امور رمیش سنگھ اروڑہ نے کہا کہ دعائیہ تقریب میں پنجاب بھر سے آئے لوگوں کا شکریہ ادا کرتا ہوں اور اپیل کرتا ہوں کہ مسیحی برادری بھی سیلاب متاثرین کی امداد کے لیے اپنا کردار ادا کرے۔

(جاری ہے)

تقریب میں دیگر محکموں کے افسران سمیت پنجاب بھر سے سینکڑوں کی تعداد میں مسیح برادری اور بیرون ملک کے مہمانوں نے بھی شرکت کی، اس موقع پر پاسٹر شاہد، سردار پاسٹر طارق، پاسٹر سجاد انور، پاسٹر رفیق بٹ، ڈاکٹر پطرس آصف اور سلمان گل بھی موجود تھے، پاسٹر سجاد انور اور پاسٹر طارق نے مسیحی برادری کے لیے جامع اجتماعی دعا کروائی، مسیحی برادری نے روحانی سکون کے لیے منعقدہ دعائیہ تقریب پر منتظمین کا شکریہ ادا کیا۔