Live Updates

صوبائی وزیر فضل حکیم خان یوسفزئی کا اللہ اکبر کالونی سیدو شریف کا دورہ ، اہل علاقہ نے مسائل سے آگاہ کیا

اتوار 14 ستمبر 2025 20:25

سوات (اُردو پوائنٹ اخبارتازہ ترین - این این آئی۔ 14 ستمبر2025ء)خیبرپختونخوا کے وزیر برائے لائیو سٹاک، فشریز و کوآپریٹو فضل حکیم خان یوسفزئی نے اللہ اکبر کالونی سیدو شریف کا دورہ کیا اور علاقہ مکینوں کی جانب سے منعقدہ جرگے میں شرکت کی۔ جرگہ مشران نے صوبائی وزیر کو اللہ اکبر کالونی سیدو شریف میں گلی کوچوں میں تجاوزات، چھوٹے رابطہ پل کی وجہ سے بارش اور سیلاب کے دوران گھروں میں پانی داخل ہونے کے مسائل، اس پل کو بڑا کرنے کی ضرورت سمیت دیگر بنیادی عوامی مشکلات سے آگاہ کیا۔

صوبائی وزیر نے ان کے مسائل غور سے سنے اور یقین دہانی کرائی کہ ان مسائل کے حل کے لیے جلد اور عملی اقدامات اٹھائے جائیں گے۔ اس موقع پر چیئرمین حبیب اللہ خان سمیت معززین علاقہ بڑی تعداد میں شریک تھے۔

(جاری ہے)

فضل حکیم خان نے اپنے خطاب میں کہا کہ صوبائی حکومت اپنے منشور کے مطابق عوامی مسائل کے پائیدار حل، بنیادی سہولیات کی فراہمی اور ترقیاتی منصوبوں کی بروقت تکمیل کے لیے پرعزم ہے۔

انہوں نے کہا کہ عوامی جرگے صوبائی حکومت اور عوام کے درمیان رابطے کا بہترین ذریعہ ہیں اور یہ عوامی شمولیت کی وہ عملی مثال ہیں جو ہماری صوبائی حکومت کے وژن اور منشور کی عکاسی کرتی ہیں۔ انہوں نے کہا کہ عوامی خدمت کو فرض سمجھ کر جرگے میں پیش کیے گئے تمام مسائل کو ترجیحی بنیادوں پر حل کیا جائے گا تاکہ علاقے کے عوام کو حقیقی ریلیف فراہم کیا جاسکے۔