Live Updates

پاکستان سیلابوں اور قدرتی آفات سے ہونے والے بھاری جانی اور مالی نقصانات کا متحمل نہیں ہوسکتا، ریحان نسیم بھراڑہ

پیر 15 ستمبر 2025 11:30

مکوآنہ(اُردو پوائنٹ اخبارتازہ ترین - این این آئی۔ 15 ستمبر2025ء)فیصل آباد چیمبر آف کامرس اینڈ انڈسٹری کے صدر ریحان نسیم بھراڑہ نے کہا ہے کہ پاکستان جیسا ترقی پذیر ملک ہر سال سیلابوں اور قدرتی آفات سے ہونے والے بھاری جانی اور مالی نقصانات کا متحمل نہیں ہوسکتا۔ اس لئے ان سے بچنے کیلئے فوری اور طویل المدتی حکمت عملی وضع کرنے کی ضرورت ہے۔ انہوں نے کہا کہ اصولی طور پر تمام طبقے ماحولیاتی تبدیلیوں سے پیش آنے والے خطرات سے نمٹنے کیلئے مشترکہ کوششیں کرنے پر متفق ہیں جبکہ وزیر اعظم شہباز شریف پہلے ہی ماحولیاتی اور زرعی ایمرجنسی کا اعلان کر چکے ہیں۔

انہوں نے کہا کہ اس سلسلہ میں فیلڈ مارشل عاصم منیر کا بیان بھی انتہائی بر محل ہے کہ ریاست پاکستان ہر سال جانوں اور املاک کے نقصان کی متحمل نہیں ہوسکتی۔

(جاری ہے)

اس لئے حکومت کو ان نقصانات پر قابو پانے کیلئے اجتماعی دانشمندی کو بروئے کار لاتے ہوئے ایسی حکمت عملی اختیار کرنا ہوگی جس سے ان نقصانات سے بچا جا سکے۔ انہوں نے اس سلسلہ میں فاضل پانی کو سٹور کرنے کیلئے نئے ڈیم اور بیراج بھی تعمیر کرنے کی تجویز پیش کی ہے۔

انہوں نے کہا کہ اس طرح نہ صرف سیلابی پانی سے ہونے والے غیر معمولی نقصانات سے بچا جا سکے گا بلکہ اس کو ذخیرہ کر کے مزید زرعی رقبوں کو بھی آباد کیا جا سکے گا۔ انہوں نے کہا کہ ان اقدامات کو اس طرح ڈیزائن کیا جائے کہ ان سے ملکی زرعی پیداوار میں اضافے کے ساتھ ساتھ روزگار کے بھی نئے مواقع پیدا ہوں۔