گلگت بلتستان میں پاک فوج کے زیر اہتمام پہلی نیشنل سرفرنگاہ میراتھن 2025 کا انعقاد

پیر 15 ستمبر 2025 14:05

اسلام آباد (اُردو پوائنٹ اخبارتازہ ترین - اے پی پی۔ 15 ستمبر2025ء) گلگت بلتستان کے ضلع شگر میں پاک فوج کے زیر اہتمام پہلی نیشنل سرفرنگاہ میراتھن 2025 کا کامیاب انعقاد کیا گیا، کلو میٹر کی اس میراتھن میں پاکستان بھر سے ایک ہزار ایتھلیٹس نے حصہ لیا جن میں گلگت بلتستان کے کھلاڑیوں کے ساتھ غیر ملکی ایتھلیٹس بھی شامل تھے۔تفصیلات کے مطابق اس میراتھن نے نہ صرف کھیلوں بلکہ ایڈونچر ٹورازم کو بھی نئی جہت دی۔

ملکی و غیر ملکی سیاحوں نے ایونٹ کو یادگار قرار دیتے ہوئے کہا کہ یہ علاقے میں صحت مند سرگرمیوں اور سیاحت کے فروغ کا ضامن ہے۔اختتامی تقریب کے مہمان خصوصی گورنر گلگت بلتستان سید مہدی شاہ تھےجنہوں نے نمایاں کارکردگی دکھانے والے ایتھلیٹس میں انعامات تقسیم کیے۔

(جاری ہے)

میراتھن کے فاتح کو 6 لاکھ روپے کا نقد انعام دیا گیا جبکہ مجموعی طور پر 40 لاکھ روپے مالیت کی نقد رقم، ٹرافیاں اور شیلڈز تقسیم کی گئیں۔

پہلے 50 ایتھلیٹس کو سرٹیفکیٹس اور نقد انعامات ملےجن میں 26 کا تعلق گلگت بلتستان کے مختلف علاقوں سے تھا۔شرکا اور مقامی عوام نے پاک فوج کا شکریہ ادا کرتے ہوئے کہا کہ یہ ایونٹ نوجوانوں کی صلاحیتوں کو اجاگر کرنے، صحت کے فروغ اور سیاحت کی ترقی کا بہترین ذریعہ ہے۔ انہوں نے امید ظاہر کی کہ آئندہ بھی اس طرح کے ایونٹس کا سلسلہ جاری رہے گا۔