بھارت جارحانہ ہتھکنڈوں سے کشمیریوں کی جدوجہد آزادی کو دبا نہیں سکتا، کل جماعتی حریت کانفرنس

جمعہ 19 ستمبر 2025 15:15

سرینگر (اُردو پوائنٹ اخبارتازہ ترین - اے پی پی۔ 19 ستمبر2025ء) کل جماعتی حریت کانفرنس نے کہا ہے کہ بھارت کشمیریوں کی حق پر مبنی جدوجہد آزاد ی کو دبانے کے لئے جارحانہ ہتھکنڈے استعمال کر رہا ہے تاہم وہ اپنے مذموم عزائم میں ہرگز کامیاب نہیں ہو گا۔کشمیرمیڈیاسروس کے مطابق حریت کانفرنس کے ترجمان ایڈووکیٹ عبدالرشید منہاس نے سرینگر میں جاری بیان میں کہا کہ بھارت نے جموں و کشمیرکو ایک فوجی چھائونی میں تبدیل کر دیا ہے جہاں لاکھوں کی تعداد میں تعینات قابض فوجی نہتے کشمیریوں کو وحشیانہ مظالم اور انسانی حقوق کی سنگین خلاف ورزیوں کانشانہ بنا رہے ہیں۔

انہوں نے بوٹینگو سوپور میں حریت کانفرنس کے سابق چیئرمین پروفیسر عبدالغنی بٹ کے انتقال پر افسوس کا اظہار کیااورقابض فورسز کی طرف سے سوگوار خاندان کے ساتھ اظہار تعزیت کے لئے جانے والے سوگواروں کو روکنے اورہراساں کیے جانے کی شدیدمذمت کی۔

(جاری ہے)

حریت ترجمان نے سینئر حریت رہنمائوں میر واعظ عمر فاروق، مولانا مسرور عباس انصاری اور دیگر رہنمائوں کی گھر وں میں نظربندی کی بھی مذمت کی ۔

انہوں نے کہاکہ کشمیری عوام گزشتہ سات دہائیوں سے بھارتی تسلط سے آزادی کے لئے بے مثال قربانیاں دے رہے ہیں اور وہ اپنی جدوجہد آزادی کواس کے منطقی انجام تک جاری رکھنے کے لئے پر عزم ہیں ۔انہوں نے انسانی حقوق کی بین الاقوامی تنظیموں سے اپیل کی ہے کہ وہ غیر قانونی طورپر نظر بند کشمیری سیاسی رہنمائوں، کارکنوں اورنوجوانوں کی رہائی کے لئے اپنا کردار ادا کریں۔حریت ترجمان نے کہا کہ جموں و کشمیرمیں بھارت کے ظالمانہ اقدامات بین الاقوامی قانون کے تحت انسانیت کے خلاف جرم ہیں۔ انہوں نے اقوام متحدہ کے سیکرٹری جنرل پر زور دیا کہ وہ کشمیریوں کی خواہشات کے مطابق تنازعہ کشمیر کے حل کے لئے اپنا کردار ادا کریں۔