پاکستان میں لاوارث ملنے والی چینی سوشل میڈیا اسٹار نے اپنے مداح سے شادی کرلی

پیر 22 ستمبر 2025 21:06

بیجنگ(اُردو پوائنٹ اخبارتازہ ترین - این این آئی۔ 22 ستمبر2025ء) پاکستان میں لاوارث ملنے والی لڑکی جو اب چین میں سوشل میڈیا اسٹار بن گئی ہے نے اپنے چینی مداح سے شادی کرلی ہے۔چین میں مقیم 20 سالہ پاکستانی نڑاد سوشل میڈیا انفلوئنسر فین زیہے نے اپنے پاکستانی حسن اور وسطی چین کے صوبہ ہینان کے مخصوص مقامی لہجے کی بدولت چینی سوشل میڈیا پر 18 لاکھ سے زیادہ فالوورز بنالیے ہیں۔

چینی میڈیا کے مطابق فین پاکستان میں ایک گتے کے ڈبے میں لاوارث ملی تھیں اور انہیں اس وقت پاکستان میں کام کرنے والے ایک بے اولاد چینی جوڑے نے گود لے لیا تھا۔

(جاری ہے)

چینی جوڑا انہیں اپنے ساتھ پاکستان سے ہینان کے ایک دیہی علاقے میں لے آیا، طویل عمری کی علامت کے طور پر ان کا نام ’’فین زیہے‘‘رکھا گیا اور جوڑے نے اپنی محدود آمدنی کے باوجود فین کو بے پناہ محبت سے پالا۔

فین کی زندگی 2023 کے آخر میں اس وقت ڈرامائی طور پر بدل گئی جب ان کی ایک مختصر ویڈیو وائرل ہوئی جس میں وہ ہینان کے گاڑھے لہجے میں نوڈلز کھاتے ہوئے اس کی تعریف کر رہی تھیں۔ اس ویڈیو کو 14 لاکھ سے زیادہ لائکس ملے۔ دیکھنے والے نہ صرف ان کی خوبصورتی سے متاثر ہوئے بلکہ اپنے گود لینے والے والدین کے ساتھ ان کے مضبوط رشتے نے بھی سب کے دل جیت لیے۔