Live Updates

سیلاب سے نقصانات ،بحالی ،بچائو کیلئے سفارشات مرتب کرنے کیلئے اعلی اختیاراتی پارلیمانی کمیٹی قائم

منگل 23 ستمبر 2025 15:12

لاہور(اُردو پوائنٹ اخبارتازہ ترین - این این آئی۔ 23 ستمبر2025ء)حالیہ سیلاب سے نقصانات کی تحقیقات ،متاثرین کی بحالی کیلئے لائحہ عمل مرتب کرنے اور آئندہ سیلاب سے بچائو کیلئے سفارشات مرتب کرنے کیلئے اعلی اختیاراتی پارلیمانی کمیٹی قائم کردی گئی ۔پیپلز پارٹی کے سید علی حیدر گیلانی کو کمیٹی کا سربراہ مقرر کیا گیا ہے جبکہ کمیٹی میں 24اراکین اسمبلی شامل ہیں۔

پنجاب اسمبلی سیکرٹریٹ نے کمیٹی کے قیام کا نوٹیفکیشن جاری کردیا ہے ۔کمیٹی تیس دن میں اپنی رپورٹ مرتب کر کے پیش کر ے گی۔بتایا گیا ہے کہ کمیٹی سیلاب سے زراعت ،لائیو سٹاک،انفراسٹرکچر کے نقصانات کا جائزہ لے کر متاثرین کے نقصان کا تخمینہ لگائے گی،کمیٹی سیلاب میں انسانی جانوں کے ضیاع کے اسباب و عوامل کا جائزہ لے اورمتاثرہ افراد کی بحالی کے بارے سفارشات مرتب کر ے گی۔

(جاری ہے)

کمیٹی سیلاب میں سرکاری محکموں کی کارکردگی اور انتظامی امور پر بھی غور اورمستقبل میں سیلاب سے بچائو کے لئے تدبیر بھی تجویز کر ے گی۔کمیٹی سیلاب میں پنجاب اور وفاق کے درمیان کوارڈی نیشن کے بارے بھی معلومات حاصل کرے گی،کمیٹی سیلاب سے قبل وارننگ سسٹم کو بہتر بنانے کے لئے اقدامات تجویز کرے گی،کمیٹی تیس دن میں اپنی سفارشات مرتب کرے گی،کمیٹی کسی بھی ماہر کو اجلاس میں طلب کرسکے گی۔