جموں وکشمیر میں حکومت کے تمام اختیارات لیفٹیننٹ گورنر کے ہاتھ میں ہیں، فاروق عبداللہ

منگل 23 ستمبر 2025 21:20

سرینگر (اُردو پوائنٹ اخبارتازہ ترین - اے پی پی۔ 23 ستمبر2025ء) غیرقانونی طورپر بھارت کے زیر قبضہ جموں وکشمیرمیں نیشنل کانفرنس کے صدر فاروق عبداللہ نے اعتراف کیاہے کہ حکومت کے اختیارات ہمارے ہاتھ میں نہیں بلکہ تمام اختیارات لیفٹیننٹ گورنر کے ہاتھ میں ہیں۔ کشمیرمیڈیاسروس کے مطابق فاروق عبداللہ نے سرینگر کے علاقے برزلہ میں صحافیوں سے گفتگو کرتے ہوئے کہاکہ علاقے میں حکومت چلانا تلوار کی دھار پر چلنے کے مترادف ہے۔

انہوں نے کہاکہ ہم پیچھے نہیں ہٹیں گے اورآگے چلتے رہیں گے ۔ ریاستی حیثیت کی بحالی کے حوالے سے انہوں نے کہاکہ نہ صرف نیشنل کانفرنس بلکہ ریاست کے ہر فرد کو امید ہے کہ ہمیں ریاستی درجہ ضرور ملے گا۔ رکن اسمبلی معراج ملک کی نظربندی کے حوالے سے انہوں نے کہاکہ ایک افسر کے بارے میں جوزبان استعمال کی گئی وہ غیر مہذب تھی لیکن اس پر معراج ملک پر پی ایس اے لگانا بھی غلط ہے ، اس مسئلے کو بات چیت کے ذریعے حل کیا جاسکتا تھا۔

(جاری ہے)

دریں اثناء سیاسی ذرائع نے کہاکہ بھارتیہ جنتا پارٹی مقبوضہ جموں و کشمیر میں نئے انتخابات کرانا چاہتی ہے اور عمر عبداللہ پر دبائو ڈال رہی ہے کہ وہ مستعفی ہوجائیں۔ ذرائع کے مطابق بی جے پی کا منصوبہ ہے کہ مقبوضہ جموں وکشمیر پر جموں خطے سے تعلق رکھنے والا ایک ہندووزیر اعلیٰ مسلط کیا جائے تاکہ علاقے پر اپنے سیاسی کنٹرول کو مزید مستحکم کرسکے۔