ایل ڈی اے سٹی کے نئے بلاکس میں رہائشی پلاٹوں کے پوزیشن دینے کی تقریب

لاہور (اُردو پوائنٹ اخبارتازہ ترین - اے پی پی۔ 24 ستمبر2025ء) ایل ڈی اے سٹی کے چار نئے بلاکس میں رہائشی پلاٹوں کے پوزیشن دینے کی تقریب گزشتہ روز ایل ڈی اے سٹی سکیم میں منعقد ہوئی۔ وزیر ہائوسنگ بلال یاسین، وائس چیئرمین ایل ڈی اے میاں مرغوب احمد اور ڈی جی ایل ڈی اے طاہر فاروق نے تقریب میں شرکت کی۔ ترجمان کے مطا بق وزیر ہائوسنگ اور وائس چیئرمین ایل ڈی اے نے الاٹیز میں پوزیشن لیٹر تقسیم کیے۔

اس موقع پربلال یاسین نے تقریب سے خطاب کرتے ہوئے کہا کہ ایل ڈی اے سٹی میں مجموعی طور پر ساڑھے 6 ہزار سے زائد پلاٹوں کے پوزیشن دیئے جا چکے ہیں۔انہوں نے کہاکہ وزیراعلی مریم نواز کی حکومت نے انتہائی کم وقت میں ایل ڈی اے سٹی میں ریکارڈ ڈویلپمنٹ کی ہے، ایل ڈی اے سٹی سہولیات کے حوالے سے شہر کی کسی بھی نجی سکیم سے کم نہیں،وزیراعلی پنجاب کا ویژن ہے کہ جس کے پاس چھت نہیں ، اسے اپنی چھت مہیا کریں۔

(جاری ہے)

انہوں نے کہاکہ آئندہ ماہ کے آخر تک ''اپنی چھت اپنا گھر پروگرام ''کے تحت ایک لاکھ لوگوں کو گھروں کی تعمیر کا قرض دے دیں گے،کم آمدن والے افراد کیلئے وزیراعلی مریم نواز کے منصوبے انتہائی کار آمد ثابت ہو نگے،ایل ڈی اے سٹی فیروز پور روڈ، ڈیفنس روڈ اور رنگ روڈ کے درمیان آئیڈیل لوکیش پر ہے۔وزیر ہائوسنگ نے ایل ڈی اے سٹی میں ترقیاتی کام تیز کرنے پر ڈی جی ایل ڈی اے اور ان کی ٹیم کی تعریف کی۔

وائس چیئر مین ایل ڈی اے میاں مرغوب احمد نے کہا کہ ایل ڈی اے سٹی، جناح سیکٹر کے اے ون، بی ون، ایچ اور ایل بلاک کے کل 28 سو سے زائد پلاٹوں کے پوزیشن اوپن کر دیئے گئے ہیں۔انہوں نے کہاکہ وزیراعلی مریم نواز کی خصوصی ہدایت پر ایل ڈی اے سٹی میں الاٹیز گھر بنانے کے قابل ہو رہے ہیں۔ڈی جی ایل ڈ ی اے طاہر فاروق نے کہا کہ ایل ڈی اے سٹی پنجاب کی سب سے بڑی پبلک سیکٹرسکیم اور صوبائی دارالحکومت میں ایل ڈی اسے سٹی سب سے بہتر ہائوسنگ پراجیکٹ ہے۔

انہوں نے کہاکہ نیلم روڈ کی تعمیر سے ایل ڈی اے سٹی جوہر ٹائون سے چند منٹ کی مسافت پر ہو گی، ایل ڈی اے سٹی سپورٹس کمپلیکس کو بھی جلد ڈویلپ کریں گے۔تقریب میں ایڈیشنل ڈی جی، چیف انجینئر ایل ڈی اے، چیف میٹرو پولیٹن پلاننگ، چیف ٹائون پلانر، ڈائریکٹر ایل ڈی اے سٹی، پراجیکٹ ڈائریکٹر اور متعلقہ افسران نے شرکت کی۔بعدازاں وزیر ہائوسنگ نے ڈی جی ایل ڈی اے کے ہمراہ ایل ڈی اے سٹی کے مختلف بلاکس میں ترقیاتی کاموں کا جائزہ لیا۔