بیٹیوں کو HPV ویکسین لگوائیں، کینسر سے بچائیں ،سردار محمد یعقوب خان ناصر

بدھ 24 ستمبر 2025 20:45

لورالائی (اُردو پوائنٹ اخبارتازہ ترین - این این آئی۔ 24 ستمبر2025ء) مسلم لیگ ن کے مرکزی رہنماء رکن قومی اسمبلی سردار محمد یعقوب خان ناصر نے بلوچستان کے عوام سے اپیل کی ہے کہ وہ اپنی بیٹیوں کو HPV ویکسین ضرور لگوائیں تاکہ انہیں مستقبل میں جان لیوا سروائیکل کینسر سے محفوظ رکھا جا سکے HPV وائرس خواتین کے لیے ایک خاموش مگر خطرناک دشمن ہے جو ہر سال ہزاروں خواتین کو کینسر میں مبتلا کر دیتا ہے۔

تاہم خوش آئند بات یہ ہے کہ اس سے بچاؤ ممکن ہے۔

(جاری ہے)

دنیا کے 130 سے زائد ممالک میں یہ ویکسین بچیوں کو دی جا رہی ہے۔ اگر 9 سے 14 سال کی بچیوں کو بروقت ویکسین لگائی جائے تو مستقبل میں 90 فیصد تک کیسز کو روکا جاسکتا ہے انہوں نے کہا کہ ملک بھر میں HPV ویکسینیشن مہم جاری ہے جس کے دوران والدین اپنی بیٹیوں کو یہ ویکسین مفت لگوا سکتے ہیں انہوں نے والدین پر زور دیا کہ وہ اپنی بیٹیوں کے روشن اور صحت مند مستقبل کے لیے اس مہم کا حصہ بنیں اور حکومت پاکستان کے اس اقدام کو کامیاب بنائیں اور بے بنیاد پروپیگنڈے پر کان نہ دھریں کیونکہ وفاقی وزیر صحت مصطفی کمال نے اپنی بیٹی کو انجکشن لگا کر تمام افواہوں کو بے بنیاد قرار دیدیا ہے۔