Live Updates

عالمی شہرت یافتہ لینڈ سکیپ آرکیٹیکٹ اوراسپنج سٹیز"کے خالق کونگجیان یو ڈاکیومنٹری کی شوٹنگ کے دوران طیارہ حادثے میں ہلاک

جمعرات 25 ستمبر 2025 11:00

ساؤ پاؤلو (اُردو پوائنٹ اخبارتازہ ترین - اے پی پی۔ 25 ستمبر2025ء) چین کے عالمی شہرت یافتہ لینڈ سکیپ آرکیٹیکٹ اورسپنج سٹیز"کے خالق کونگ جیان یو برازیل میں اپنی زندگی پر ڈاکیومنٹری کی شوٹنگ کے دوران طیارہ حادثے میں پائلٹ اور 2 فلمسازوں سمیت ہلاک ہو گئے۔اے ایف پی کے مطابق ایوارڈ یافتہ ماہر تعمیرات یو برازیل میں اپنے کام پر ایک دستاویزی فلم کی ریکارڈنگ کے سلسلے میں موجود تھے جب منگل کی رات ریاست میٹو گروسو دو سول میں طیارہ گر کر تباہ ہو گیا، دیگر ہلاک شدگان میں دستاویزی فلم ساز لوئز فرنانڈو فیرس داکنا فیرز اور روبنز کرسپم جونیئر شامل تھے جبکہ پائلٹ طیارے کا مالک بھی تھا۔

پولیس کے مطابق حادثے کی وجوہات ابھی معلوم نہیں ہو سکیں۔62 سالہ یو کو پائیدار شہری منصوبہ بندی کا صفِ اوّل کا معمار مانا جاتا تھا، ان کے "سپنج سٹیز" منصوبے میں کنکریٹ کی جگہ قدرتی ڈھانچوں کو ترجیح دی جاتی ہے تاکہ بارش اور سیلابی پانی کو جذب کیا جا سکے۔

(جاری ہے)

برازیلی صدر لوئیز ایناسیو لولا ڈا سلوا نے حادثے پر گہرے دکھ اور افسوس کا اظہار کیا۔

اپنے پیغام میں انہوں نے کہا کہ ماحولیاتی تبدیلی کے دور میں کونگجیان یو ایک عالمی حوالہ بن چکے تھے، ان کے سپنج سٹیز معیار زندگی اور ماحولیاتی تحفظ کا حسین امتزاج ہیں، جو مستقبل کے لیے ناگزیر ہیں۔برازیل کی کونسل آف آرکیٹیکچر اینڈ اربنزم نے کہا کہ ان کا سپنج سٹیز تصور 250 شہروں میں ایک ہزار سے زائد منصوبوں میں نافذ کیا جا چکا ہے، ان کی خدمات نے نہ صرف چین بلکہ دنیا کے دیگر ممالک میں بھی ماحولیاتی عوامی پالیسیوں کو متاثر کیا ہے۔