وزیراعظم اوربانی بل گیٹس فائونڈیشن کی ملاقات، صحت، معیشت کی ڈیجیٹلائزیشن کیلئے تعاون پر اتفاق

جمعرات 25 ستمبر 2025 22:36

نیویارک(اُردو پوائنٹ اخبارتازہ ترین - این این آئی۔ 25 ستمبر2025ء) وزیراعظم شہباز شریف سے بل گیٹس فاؤنڈیشن کے بانی بل گیٹس نے اقوام متحدہ جنرل اسمبلی 80اجلاس کی سائیڈ لائن پر خوشگوار ماحول میں ملاقات کی۔وزیر اعظم آفس کے مطابق وزیراعظم نے بل گیٹس فاؤنڈیشن کی طرف سے 2022کے سیلاب کے پیش نظر قابل ذکر امدادی کارروائیوں کو یاد کرتے ہوئے حالیہ 2025کے سیلاب کے بعد دی جانے والی امداد کو بھی قابل تحسین قرار دیا۔

(جاری ہے)

وزیراعظم نے پاکستان میں پولیو کے تدارک، قوت مدافعت اور غذائی معیار میں اضافہ، اور معاشی شمولیت کیلئے حکومتی اقدامات میں بل گیٹس فاؤنڈیشن کے تعاون کا شکریہ ادا کیا۔مزید براں وزیراعظم نے پولیو کیمکمل تدارک کے حصول میں بل گیٹس فاؤنڈیشن کے مسلسل تعاون کی اہمیت پر خصوصی زور دیا۔ وزیراعظم نے حکومت کی طرف سے کی جانے والی جامع معاشی ریفارمز، ڈیجیٹلائزیشن میں بل گیٹس فاؤنڈیشن کی عملی اور مثبت تعاون کی خصوصی تعریف کی۔ وزیراعظم شہباز شریف اور بل گیٹس نے پاکستان کی معاشی و معاشرتی ترقی بالخصوص صحت، غذائی معیار و مدافعت میں اضافہ، معاشی شمولیت اور معیشت کی ڈیجیٹلائزیشن جیسے اقدامات میں مشترکہ تعاون کو جاری رکھنے کے عزم کا اعادہ کیا۔