Live Updates

حارث رؤف ٹی ٹونٹی ٹورنامنٹس میں 50 وکٹیں لینے والے پہلے پاکستانی باؤلر بن گئے

انہوں نے یہ اعزاز بنگلہ دیش کے خلاف تین وکٹیں لے کر حاصل کیا

ذیشان مہتاب جمعہ 26 ستمبر 2025 10:46

حارث رؤف ٹی ٹونٹی ٹورنامنٹس میں 50 وکٹیں لینے والے پہلے پاکستانی باؤلر ..

دبئی (اردو پوائنٹ تازہ ترین اخبار ۔ 26 ستمبر 2025ء ) فاسٹ باؤلر حارث رؤف ٹی ٹونٹی کرکٹ کے ٹورنامنٹس میں 50 وکٹیں لینے والے پہلے پاکستانی باؤلر بن گئے۔

انہوں نے یہ اعزاز بنگلہ دیش کے خلاف تین وکٹیں لے کر حاصل کیا۔

ایشیا کپ کے سپر فور مرحلے میں حارث رؤف نے چار اوورز میں تین وکٹیں لے کر حاصل کیا۔

واضح رہے کہ یہ ٹی 20 وکٹیں نہیں بلکہ ملٹی نیشنل ٹورنامنٹس کی وکٹیں ہیں۔

حارث رؤف نے 50 وکٹوں کا سنگ میل 32 میچوں میں عبور کیا ہے۔ شاہد آفریدی اس فہرست میں دوسرے نمبر پر ہیں جنہوں نے 43 میچز میں 47 وکٹیں حاصل کیں ۔

عمر گل 29 میچز میں 42 وکٹوں کے ساتھ تیسرے اور شاہین آفریدی 29 میچوں میں 40 وکٹوں کے ساتھ چوتھے نمبر پر ہیں۔

واضح رہے کہ ایشیا کپ کے سپر فور مرحلے میں پاکستان نے بنگلادیش کو 11 رنز سے شکست دے کر فائنل میں جگہ بنالی۔

(جاری ہے)

دبئی کرکٹ سٹیڈیم میں کھیلے گئے میچ میں بنگلادیش کی ٹیم 136 رنز کاتعاقب کرتے ہوئے مقررہ اوورز میں 9 وکٹوں کے نقصان پر 124 رنز بنا سکی۔ بنگلادیش کی جانب سے شمیم حسین 30 رنز بنا کر نمایاں رہے۔ سیف حسن 18، نورالحسن 16، مہدی حسن 11، تنظیم حسن ثاقب 10، کپتان جاکر علی 5، توحید ہرودئے 5، تسکین احمد 4 اور پرویز حسین ایمان 0 پر آؤٹ ہوئے۔ رشاد حسین اور مستفیض الرحمان بالترتیب 16 اور 6 رنز بنا کر ناٹ آؤٹ رہے۔

پاکستان کی جانب سے شاہین شاہ آفریدی اور حارث رؤف نے 3، 3 جبکہ صائم ایوب نے 2 اور محمد نواز نے 1 وکٹ حاصل کی۔ اس سے قبل بنگلادیش کی دعوت پر قومی ٹیم نے پہلے بیٹنگ کرتے ہوئے مقررہ 20 اوورز میں 8 وکٹوں کی نقصان پر 135 رنز اسکور کیے۔ پاکستان کی جانب سے محمد حارث 31 رنز بنا کر نمایاں رہے۔ محمد نواز 25، شاہین شاہ آفریدی 19، کپتان سلمان آغا 19، فخر زمان 13، صاحبزادہ فرحان 4 اور حسین طلعت 3 رنز کے انفرادی اسکور پر آؤٹ ہوئے۔

فہیم اشرف 14 اور حارث رؤف 3 رنز کے ساتھ ناٹ آؤٹ پویلین لوٹے۔ صائم ایوب نے 45 بین الاقوامی ٹی ٹوئنٹی میچز کے کیریئر میں 9ویں بار صفر پر آؤٹ ہوتے ہوئے شاہد آفریدی کو پیچھے چھوڑ کر صفر پر آؤٹ ہونے والے دوسرے پاکستانی کھلاڑی بن گئے۔ بنگلادیش کی جانب سے تسکین احمد نے 3، رشاد حسین اور مہدی حسن نے 2، 2 اور مستفیض الرحمان نے 1 وکٹ حاصل کی۔ 28 ستمبر بروز اتوار کھیلے جانے والے فائنل میں بھارت کا مقابلہ پاکستان کے ساتھ ہوگا۔