چاکلیٹی ہیرو وحید مراد کی سالگرہ 2 اکتوبر کو منائی جائے گی

وحید مراد کی 1966 میں بننے والی فلم ارمان نے باکس آف کے تمام ریکارڈ توڑ دیئے 124 فلموں میں اداکاری کے جوہر دکھائے جن میں ایک پشتو اور آٹھ پنجابی فلمیں بھی شامل ہیں

ہفتہ 27 ستمبر 2025 10:35

مکوآنہ (اُردو پوائنٹ اخبارتازہ ترین - این این آئی۔ 27 ستمبر2025ء)پاکستانی فلم انڈسٹری کے چاکلیٹی ہیرو وحید مراد کی سالگرہ 2 اکتوبر کو منائی جائے گی۔ اپنی جاندار اداکاری اور گیت عکسبند کروانے میں بے مثال، نامورفلمسٹار وحید مراد 2 اکتوبر 1938 کو کراچی میں پیدا ہوئے، پاکستان کی تاریخ میں کبھی کسی بھی ہیرو کو اتنی پذیرائی حاصل نہیں ہوئی جتنی وحید مراد کو ہوئی۔

ان کے پرستاروں نے ان کے لباس، انداز اور ہیئر اسٹائل تک کو کاپی کیا۔وحید مراد نے اپنے فلمی کیرئیر کا آغاز بطور سپورٹنگ ایکٹر فلم اولاد سے کیا جبکہ بطور ہیرو ان کی پہلی فلم ہیرا اور پتھر تھی۔ وحید مراد کی 1966 میں بننے والی فلم ارمان نے باکس آف کے تمام ریکارڈ توڑ دیئے۔ وحید مراد نے 124 فلموں میں اداکاری کے جوہر دکھائے جن میں ایک پشتو اور آٹھ پنجابی فلمیں بھی شامل ہیں۔

(جاری ہے)

وحید مراد کو 2002 میں لائف ٹائم ایوارڈ اور وفات کے 27 سال بعد 2010 میں ستارہ امتیاز سے بھی نوازا گیا۔ 1980 میں وحید مراد ایک حادثے کا شکار ہوگئے جس کی وجہ سے ان کا چہرہ شدید زخمی ہوگیا اور پلاسٹک سرجری کرانا پڑی،اس کے بعد فلموں میں ناکامی نے وحید مراد کو دل برداشتہ کر دیا اور 23 نومبر 1983 کی صبح فلم انڈسٹری کا یہ درخشاں ستارہ ہمیشہ کے لئے ڈوب گیا۔ وحید مراد کی سالگرہ کے موقع پر شو بز انڈسٹری اور مختلف تنظیموں کے زیر اہتمام منعقدہ تقریبات مین ان کی خدمات پر خراج تحسین پیش کیا جائے گا۔