بھارتی بورڈ کی شکایت، حارث اور فرحان کا آئی سی سی کے سامنے مضبوط مؤقف، الزامات تسلیم کرنے سے انکار

دبئی (اُردو پوائنٹ اخبارتازہ ترین - این این آئی۔ 27 ستمبر2025ء)بھارتی بورڈ کی شکایت پر حارث رؤف اور صاحبزادہ فرحان نے انٹرنیشنل کرکٹ کونسل (آئی سی سی) کے سامنے مضبوط مؤقف اپنایا اور الزامات تسلیم کرنے سے انکار کر دیا۔بھارتی بورڈ کی شکایت پر میچ ریفری رچی رچرڈسن نے پاکستانی کرکٹرز کے کیس کی سماعت کی جس میں آئی سی سی ضابطہ اخلاق کے تحت حارث رؤف اور صاحبزادہ فرحان پیش ہوئے۔

ذرائع کے مطابق میچ ریفری رچی رچرڈسن نے کرکٹرز سے مختلف نوعیت کے سوالات کیے، کرکٹرز نے تحریری طور پر بھی جواب جمع کروائے۔ کرکٹرز نے اپنا کیس مضبوط انداز میں میچ ریفری کے سامنے رکھا۔صاحبزادہ فرحان نے الزامات کا اعتراف نہیں کیا، انہوں نے کہا کہ سیاسی نوعیت کی سیلیبریشن نہیں تھی، بھارت کو سیلیبریشن میں ٹارگٹ نہیں کیا تھا۔

(جاری ہے)

پختون روایات میں ایسے ہی سیلیبریشن کرتے ہیں۔

ذرائع کے مطابق حارث رؤف سے 0-6 کا اشارہ کرنے کے بارے میں پوچھا گیا، تو حارث رؤف نے اپنے اوپر لگنے والے الزامات کے اعتراضات کا پوچھ لیا۔حارث رؤف نے سماعت دوران سوال کیا کہ مجھے بتایا جائے کہ آپ لوگوں کے خیال میں اس کا کیا مطلب ہے۔ حارث رؤف نے ریفری سے سوال کیا کہ 0-6 کا مطلب بتائیں ریفری رچی رچرڈسن اس سوال پر خاموش ہو گئے تھے۔ذرائع نے بتایا کہ ریفری رچی رچرڈسن نے حارث رؤف سے کہا آپ کا اشارہ شاید کسی اور چیز کی طرف تھا جس پر حارث نے کہا کہ آپ بتائیں میں کس چیز کی طرف اشارہ کر رہا تھا ریفری نے حارث سے پوچھا کہ آپ نے اشارہ بار بار کیوں کیا جس پر حارث کا کہنا تھا کہ یہ صرف شائقین کے لیے تھا، اس کے علاوہ کچھ نہیں۔

ذرائع کے مطابق الزامات کے حق میں کوئی ثبوت نہیں، حارث رؤف کا تحریری جواب میں بھی یہی موقف رہا۔واضح رہے کہ بھارت نے انٹرنیشنل کرکٹ کونسل (آئی سی سی) سے پاکستان ٹیم کے کھلاڑیوں کی شکایت کی تھی۔بھارتی میڈیا کی رپورٹ کے مطابق بھارتی کرکٹ بورڈ نے آئی سی سی سے حارث رؤف اور صاحبزادہ فرحان کے خلاف سخت ایکشن لینے کا مطالبہ کیا تھا۔بھارتی کرکٹ بورڈ نے آئی سی سی کو ای میل کے ذریعے شکایت کی تھی۔

بھارتی کرکٹ بورڈ نے میچ کے دوران پاکستانی کھلاڑیوں کی جانب سے اشتعال انگیز اشارے کرنے پر اعتراض کیا تھا۔بھارتی کرکٹ بورڈ نے مو?قف اختیار کیا تھا کہ حارث رؤف نے تماشائیوں کے ’کوہلی کوہلی‘ کی آوازیں لگانے پر جیٹ کریش کے اشارے کیے اور 0-6 کا نشان بنایا جبکہ صاحبزادہ فرحان نے نصف سنچری مکمل ہونے پر گن فائر سیلی بریشن کی۔