Live Updates

ایشیا کپ فائنل: بھارت کو کیسے پچھاڑا جا سکتا ہے؟، وسیم اکرم نے گر بتا دیا

ایشیا کپ میں یہ پہلا موقع ہے جب پاکستان اور بھارت فائنل میں ایک دوسرے کے مقابل ہوں گے

ذیشان مہتاب ہفتہ 27 ستمبر 2025 14:25

ایشیا کپ فائنل: بھارت کو کیسے پچھاڑا جا سکتا ہے؟، وسیم اکرم نے گر بتا ..

لاہور (اردو پوائنٹ تازہ ترین اخبار ۔ 27 ستمبر 2025ء ) پاکستان کے سابق فاسٹ باؤلر وسیم اکرم نے ایشیا کپ 2025 کے فائنل سے قبل قومی ٹیم کو بھارت کے خلاف اپنی حکمت عملی اپنانے کا مشورہ دیا ہے۔ یہ میچ اتوار کو دبئی میں کھیلا جائے گا، جہاں بھارت اور پاکستان کا مقابلہ ہو گا۔ وسیم اکرم نے کہا کہ پاکستان ٹیم کو خود پر یقین رکھنا چاہیے اور ابتدائی وکٹیں لینا ضروری ہے تاکہ بھارت کو دباؤ میں رکھا جا سکے۔

انہوں نے واضح کیا کہ فائنل بھارت اور پاکستان کے درمیان ہے، بھارت یقینی طور پر پسندیدہ ٹیم ہے، لیکن کچھ بھی ہو سکتا ہے۔ پاکستان کو اعتماد اور رفتار برقرار رکھنی ہوگی، ابتدائی وکٹیں لینے سے بھارت کو پیچھے دھکیل سکتے ہیں۔ یاد رہے کہ پاکستان نے اپنے آخری سپر فور میچ میں بنگلادیش کو 11 رنز سے شکست دے کر فائنل تک رسائی حاصل کی، ٹیم کے کپتان سلمان علی آغا نے کہا کہ ایسے میچ جیتنا یہ ثابت کرتا ہے کہ یہ ایک خاص ٹیم ہے۔

(جاری ہے)

ایشیا کپ کے موجودہ ایڈیشن میں یہ پہلا موقع ہے جب پاکستان اور بھارت ون ڈے اور ٹی ٹونٹی دونوں ایڈیشنز میں ایک دوسرے کے مقابل ہوں گے۔ پہلی مرتبہ 1984ء میں کھیلے گئے ایشیا کپ سے 2023ء تک 16 مرتبہ کھیلے جانے والے ایونٹ میں پاکستان اور بھارت نے آپس میں کئی میچز کھیلے تاہم دونوں ٹیمیں کبھی فائنل میں مدمقابل نہ آسکیں۔ گروپ اور سپر فور مرحلے میں پاکستان کو بھارت کے ہاتھوں شکست ہوئی ہے تاہم کپتان سلمان آغا فائنل میں جیت کے لیے پر امید ہیں۔ شائقین کرکٹ 28 ستمبر کو پہلی بار ایشیا کپ کے فائنل میں پاکستان اور بھارت کو کھیلتا دیکھیں گے۔ واضح رہے کہ بھارت سب سے زیادہ آٹھ مرتبہ ایشیا کپ جیت چکا ہے، سری لنکا نے چھ اور پاکستان نے دو بار ٹائٹل اپنے نام کیا ہے۔