Live Updates

محسن نقوی کا حارث رؤف کا جرمانہ اپنی ذاتی جیب سے ادا کرنے کا فیصلہ

آئی سی سی نے قومی پیسرحارث رؤف پر جرمانہ عائد کیا ہے

ذیشان مہتاب ہفتہ 27 ستمبر 2025 14:39

محسن نقوی کا حارث رؤف کا جرمانہ اپنی ذاتی جیب سے ادا کرنے کا فیصلہ

اسلام آباد (ڈیلی پاکستان آن لائن) چیئرمین پی سی بی محسن نقوی نے حارث رؤف کا جرمانہ اپنی ذاتی جیب سے ادا کرنے کا فیصلہ کیا ہے۔

نجی ٹی وی سماء نے ذرائع کے حوالے سے دعویٰ کیا ہے کہ محسن نقوی خود یہ رقم برداشت کریں گے۔

یاد رہے کہ بھارت کے خلاف میچ کے دوران قومی فاسٹ باؤلر نے چھ گیندوں پر مسلسل چھ رنز نہ بننے دینے کے بعد جہاز گرنے کا اشارہ کیا تھا، جس پر بھارتی بورڈ نے آئی سی سی کو شکایت کی۔

انٹرنیشنل کرکٹ کونسل نے گزشتہ روز بھارتی کپتان سوریا کمار، حارث رؤف اور صاحبزادہ فرحان کی پیشی کا فیصلہ سنا دیا۔

بھارتی میڈیا نے دعویٰ کیا کہ آئی سی سی نے کرکٹر حارث رؤف پر میچ فیس کا 30 فیصد جرمانہ عائد کیا ہے جبکہ صاحبزادہ فرحان کو وارننگ دے دی گئی۔

دعویٰ کے مطابق سیاسی بیان بازی پر بھارتی کپتان سوریاکمار یادیو پر بھی میچ فیس کا 30 فیصد جرمانہ عائد کیا گیا ہے۔

(جاری ہے)

واضح رہے کہ بھارتی کپتان کی جانب سے متنازع بیان دینے پر پاکستان کرکٹ بورڈ نے آئی سی سی میں شکایت درج کرائی جس پر آئی سی سی نے بھارتی کپتان کو طلب کیا تھا۔

دوسری جانب جمعہ کے روز بھارتی بورڈ کی جانب سے درج کرائی گئی شکایت پر حارث رؤف اور صاحبزادہ فرحان آئی سی سی میں پیش ہوئے تھے۔

سماعت آئی سی سی کے میچ ریفری رچی رچرڈسن نے کی جنہوں نے دونوں کھلاڑیوں سے کئی سوالات کیے۔

ذرائع کے مطابق صاحبزادہ فرحان نے غلطی تسلیم کرنے سے انکار کرتے ہوئے کہا کہ پٹھان لوگ ایسے ہی جشن مناتے ہیں، جشن کا مقصد بھارت کو کچھ ثابت کرنا نہیں تھا۔

حارث رؤف نے سماعت کے دوران کہا کہ میں نے کوئی سیاسی اشارہ نہیں کیا۔

میچ ریفری نے حارث رؤف سے پوچھا کہ چھ صفر کا کیا مطلب ہے جس پر انہوں نے الٹا میچ ریفری سے ہی پوچھ لیا کہ آپ بتادیں اس کا کیا مطلب ہے۔

تاہم، آئی سی سی نے حارث رؤف کے مؤقف کو مسترد کرتے ہوئے ان پر جرمانہ عائد کردیا۔