Live Updates

جی ایچ کیو حملہ کیس حتمی مرحلے میں داخل، آخری 3گواہان انسداد دہشتگردی کورٹ میں طلب

ہفتہ 27 ستمبر 2025 16:11

راولپنڈی(اُردو پوائنٹ اخبارتازہ ترین - این این آئی۔ 27 ستمبر2025ء)انسداد دہشتگردی کی خصوصی عدالت میں زیر سماعت جی ایچ کیو حملہ کیس حتمی مرحلے میں داخل ہوگیا، آئندہ سماعت پر مقدمے کے آخری 3 گواہان کو طلب کرلیا گیا ۔ہفتہ کو انسداد دہشتگردی کی خصوصی عدالت کے جج امجد علی شاہ نے سماعت کے دوران استغاثہ کے 3گواہان کی شہادت قلمبند کرلی۔عدالت نے بانی پی ٹی آئی عمران خان کی جانب سے دائر کی گئی ٹرائل روکنے سے متعلق دائر درخواست خارج کر دی۔

اے ٹی سی کے جج نے 8گواہان کو دوبارہ طلب کرنے سے متعلق درخواست پر پراسیکیوشن کو نوٹس جاری کر دیا۔سماعت انسداد دہشتگردی عدالت کے جج امجد علی شاہ نے کی، سماعت کے دوران ڈپٹی سپرنٹنڈنٹ آف پولیس اکبر عباس، انسپکٹر عصمت کمال، انسپکٹر تہذیب الحسن کے بیانات قلم بند کیے گئے۔

(جاری ہے)

گواہان نے گرفتار ملزمان سے برآمد ڈنڈے، جھنڈے، پولیس ہیلمٹ، لائٹڑ، فوجی مجسمے کے ٹکڑے عدالت میں پیش کر دئیے۔

گواہ انسپکٹر عصمت کمال نے چکری انٹرچینج پر پی ٹی آئی کی قیادت کی میٹنگ سے متعلق شواہد عدالت میں پیش کیے، مقدمے میں مجموعی طور 44گواہان کے بیان ریکارڈ کیے جاچکے ہیں۔عدالت نے آئندہ سماعت پر مقدمے کے آخری 3گواہان کو طلب کرتے ہوئے نوٹس جاری کر دئیے، آئندہ سماعت پر ڈی ایس پی مرزا جاوید، انسپکٹر ناظم شاہ اور انسپکٹر یعقوب شاہ کو بیان ریکارڈ کروانے کے لیے طلب کیا گیا ہے۔کیس کی مزید سماعت 30ستمبر تک ملتوی کر دی گئی۔