سیلاب متاثرین کیلئے چین کی امدادی سرگرمیاں جاری، سامان کے مزید 2 جہاز پہنچ گئے، 10 کروڑ یوآن اضافی امداد کا اعلان

اسلام آباد (اُردو پوائنٹ اخبارتازہ ترین - این این آئی۔ 28 ستمبر2025ء)چین نے پاکستان میں تباہ کن مون سون سیلاب کے تناظر میں اپنے 'آہنی بھائی' کے ساتھ یکجہتی کا اظہارکرتے ہوئے پاکستان کے متاثرین کی امداد کیلئے 10 کروڑ یوآن (تقریباً 3.94 ارب روپی) مالیت کے اضافی امدادی سامان کی فراہمی کا اعلان کر دیا۔ یہ امداد اس 20 لاکھ ڈالر کی ہنگامی معاونت کے علاوہ ہے جو چین پہلے ہی فراہم کر چکا ہے۔

گوادر پرو کے مطابق اسلام آباد میں چینی سفارت خانے نے ایک بیان میں کہاکہ ہنگامی امداد کے طور پر دیے گئے ابتدائی 20 لاکھ ڈالر کے علاوہ، چین 100 ملین یوآن مالیت کا اضافی سیلابی امدادی سامان بھی فراہم کرے گا تاکہ پاکستان کی امدادی اور بحالی کی کوششوں کو مزید تقویت دی جا سکے۔ نیشنل ڈیزاسٹر مینجمنٹ اتھارٹی (این ڈی ایم ای) کے مطابق یہ اعلان ایسے وقت میں سامنے آیا ہے جب جون کے آخر سے جاری سیلاب کے باعث 1,000 سے زائد افراد جاں بحق، 1,060 زخمی، 20 لاکھ سے زائد بے گھر ہو چکے ہیں، جبکہ زراعت اور بنیادی ڈھانچے کو بھی شدید نقصان پہنچا ہے، گوادر پرو کے مطابق اس سے قبل اسی ماہ چینی سفارت خانے نے ایک اور پیغام میں کہا تھاہم دل سے امید کرتے ہیں کہ حالیہ تباہ کن سیلاب سے متاثرہ تمام کمیونٹیز جلد از جلد بحال ہو جائیں۔

(جاری ہے)

چین اپنے پاکستانی آہنی بھائیوں اور بہنوں کے شانہ بشانہ کھڑا ہے تاکہ اس چیلنج کا مقابلہ کیا جا سکے اور متاثرہ خاندانوں کی گھروں کی دوبارہ تعمیر میں ہر ممکن مدد کی جا سکے۔ گوادر پرو کے مطابق 10 ستمبر کو بیجنگ میں ایک معمول کی پریس بریفنگ کے دوران چینی وزارت خارجہ کے ترجمان، لین جیان نے بیجنگ کی وابستگی کو دہراتے ہوئے کہا چینی قیادت نے سیلاب سے ہونے والی تباہ کاریوں پر پاکستانی قیادت سے ہمدردی کا اظہار کیا ہے۔

چین نے ہنگامی امداد فراہم کی ہے اور پاکستان کی ضرورت کے مطابق مزید امداد بھی فراہم کرے گا۔ ہمیں یقین ہے کہ پاکستانی حکومت کی قیادت میں پاکستانی عوام اس آفت سے بحالی اور تعمیر نو میں کامیاب ہوں گے۔ گوادر پرو کے مطابق 13 ستمبر کو چینی سفارت خانے کے ناظم الامور شی یوان چیانگ کی قیادت میں ایک وفد نے این ڈی ایم اے کے نیشنل ایمرجنسی آپریشن سینٹر کا دورہ کیا، جہاں انہوں نے پاکستان کو "سیلابی امداد اور بحالی کی موجودہ کوششوں میں مکمل تعاون" کی یقین دہانی کروائی۔

گوادر پرو کے مطابق چینی امداد پاکستان پہنچنا شروع ہو چکی ہے، جس کے تحت پیپلز لبریشن آرمی (PLA) نے 12,000 خیمے، جنریٹرز، واٹر پمپس اور سولر سسٹمز بھجوائے ہیں۔ پی ایل اے کے میڈیکل کیمپ سیلاب سے متاثرہ علاقوں میں مفت ادویات اور طبی سہولیات بھی فراہم کر رہے ہیں۔