طوفانی سسٹم بحیرہ عرب کی جانب بڑھنے لگا،زیریں سندھ اور کراچی سمیت ساحلی علاقوں پر اثر انداز ہونے کا امکان

نیا سسٹم بھارتی گجرات سے کچھ دور بحیرہ عرب میں داخل ہوگا، اس سسٹم کے باوجود کراچی میں گرمی کی لہر برقرار رہے گی،محکمہ موسمیات

اتوار 28 ستمبر 2025 16:05

کراچی(اُردو پوائنٹ اخبارتازہ ترین - این این آئی۔ 28 ستمبر2025ء) محکمہ موسمیات نے خبردار کیا ہے کہ خلیج بنگال میں بننے والا طوفانی سسٹم اب بحیرہ عرب کی جانب بڑھ رہا ہے۔ سسٹم زیریں سندھ اورکراچی سمیت ساحلی علاقوں پراثر انداز ہوگا۔محکمہ موسمیات کیمطابق سسٹم کے باعث اس دوران سمندری ہوائیں بند رہیں گی۔ 29 اور 30 ستمبر کو تھرپارکر،عمرکوٹ، بدین، سجاول اورسانگھڑ کے اضلاع میں گرج چمک کے ساتھ ہلکی سے درمیانی درجے کی بارش کا امکان ہے۔

(جاری ہے)

کراچی میں بھی شدید گرمی کے بعد 30 ستمبر کو دوپہر یا شام میں ہلکی بارش متوقع ہے۔ محکمہ موسمیات کے مطابق پیر، منگل اور بدھ کو بھی شہر کا موسم گرم اور مرطوب رہے گا جبکہ زیادہ سے زیادہ درجہ حرارت 35 سے 37 ڈگری سینٹی گریڈ تک جا سکتا ہے۔محکمہ موسمیات کے مطابق نیا سسٹم بھارتی گجرات سے کچھ دور بحیرہ عرب میں داخل ہوگا، اس سسٹم کے باوجود کراچی میں گرمی کی لہر برقرار رہے گی، اور سندھ کے بیشتر علاقوں میں موسم گرم اور مرطوب رہنے کا امکان ہے۔