آئی ایم ایف نے پاکستان سے توانائی شعبے میں نقصانات اور بجلی چوری روکنے کا پلان طلب کرلیا

پیر 29 ستمبر 2025 18:43

اسلام آباد (اُردو پوائنٹ اخبارتازہ ترین - این این آئی۔ 29 ستمبر2025ء)پاکستان اور عالمی مالیاتی فنڈ (آئی ایم ایف) کے درمیان دوسرے اقتصادی جائزہ مذاکرات پیر کو بھی جاری رہے اور آئی ایم ایف نے توانائی کے شعبے میں گردشی قرض کا اِن فلو جلد ختم کرنے کا مطالبہ کیا ہے۔میڈیا رپورٹ کے مطابق آئی ایم ایف نے پاکستان سے توانائی کے شعبے میں ہونے والے نقصانات اور بجلی چوری روکنے کا پلان اور کیپیسٹی چارجز میں کمی کی تجاویز مانگ لی ہیں۔

(جاری ہے)

پاکستانی حکام نے آئی ایم ایف کو گردشی قرض 6 سال کے مقررہ ہدف سے پہلے ہی ختم کرنے کی یقین دہانی کراتے ہوئے بتایا کہ گردشی قرض کے خاتمے کے لیے بینکوں سے 1225 ارب روپے کے قرض کا معاہدہ طے پاگیا ہے۔آئی ایم ایف وفد کو بتایا گیا کہ قرض معاہدے سے صارفین پر کوئی نیا بوجھ نہیں آئے گا، ادائیگیاں پہلے سے عائد 3 روپے 23 پیسے فی یونٹ سرچارج سے کی جائیں گی، اضافی بجلی صنعتی شعبے اور کرپٹو مائننگ میں استعمال کی جائے گی۔عالمی مالیاتی فنڈ نے پاکستان سے ڈسکوز کی گورننس بہتر بنانے کے لیے اصلاحات تیز کرنے کا بھی مطالبہ کردیا۔