بانی پی ٹی آئی نے وزیراعلیٰ خیبرپختونخواہ کو حکومت میں مزید تبدیلیوں اور اصلاحات کی ہدایت کردی

پشاور ( اردوپوائنٹ اخبار تازہ ترین۔ انٹرنیشنل پریس ایجنسی۔ 30 ستمبر 2025ء ) وزیراعلیٰ خیبرپختونخواہ علی امین گنڈاپور نے کہا ہے کہ عمران خان سے مشاورت کے بعد حکومت میں اب مزید تبدیلیاں اور اصلاحات کریں گے، بانی سے کافی عرصے بعد مشاورت کیلئے کل ملاقات ہوئی۔ میڈیا کے مطابق وزیراعلیٰ علی امین گنڈاپور نے کہا کہ بانی پی ٹی آئی سے کافی عرصے بعد کل ملاقات ہوئی، کافی معاملات تھے جن پر بانی پی ٹی آئی سے مشاورت کرنا تھی۔

گزشتہ ملاقات میں بھی حکومت میں تبدیلیوں اور اصلاحات سے متعلق بات ہوئی تھی۔ اس وقت بتایا تھا کہ ہم حکومت میں کچھ تبدیلیاں لانا چاہتے ہیں، عمران خان سے ملاقات میں حکومتی اصلاحات اور کابینہ میں تبدیلیوں سے متعلق مشاورت کی ۔ عمران خان سے مشاورت کے بعد عاقب اللہ اور فیصل کو بلایا اور ان کو فیصلے سے آگاہ کیا، حکومتی معاملات میں اس طرح کی چیزیں ہوتی رہتی ہیں۔

(جاری ہے)

عاقب اللہ اور فیصل تراکئی میری ٹیم کا حصہ رہے ہیں۔ عمران خان سے مشاورت کے بعد حکومت میں اب مزید تبدیلیاں اور اصلاحات کررہے ہیں۔ عمران خان نے پارٹی اور حکومت کے حوالے سے احکامات دیئے ہیں۔ مزید برآں مشیر اطلاعات خیبرپختونخواہ بیرسٹر ڈاکٹر سیف نے اپنے بیان میں کہا کہ وزیراعلیٰ علی امین خان گنڈاپور نے عمران خان سے اڈیالہ جیل میں اہم ملاقات کی۔

ملاقات دو گھنٹے سے زائد جاری رہی۔ ملاقات میں خیبر پختونخوا میں امن و امان، سیکیورٹی اور  متعلقہ معاملات پر تفصیلی گفتگو ہوئی۔ عمران خان نے وزیراعلیٰ علی امین گنڈاپور پر اپنے بھرپور اعتماد کا اظہار کیا۔ وزیراعلیٰ نے تمام اہم معاملات پر عمران خان کو اعتماد میں لیا اور صوبے میں امن و امان کے حوالے سے خیبر پختونخوا حکومت کے اقدامات سے آگاہ کیا۔

عمران خان کو قیام امن کے لئے قبائلی جرگوں کے انعقاد کے بارے میں بھی بتایا گیا۔ ملاقات میں افغانستان سے مذاکرات کے معاملے پر بھی تفصیلی تبادلہ خیال ہوا،عمران خان نے وزیراعلیٰ کو افغانستان کے ساتھ رابطہ کاری اور مذاکرات یقینی بنانے کی ہدایت کی۔عمران خان کو صوبے کی معاشی صورتحال اور بجٹ پر تفصیلی بریفنگ دی گئی، وزیراعلیٰ نے معیشت کی مضبوطی کے لیے صوبائی حکومت کے اقدامات سے آگاہ کیا، جس پر عمران خان نے اطمینان کا اظہار کیا۔

معاشی معاملات اور بجٹ کے حوالے سے تفصیلی  بریفنگ کے لیے عمران خان نے مشیر خزانہ مزمل اسلم  کو بھی طلب کر لیا۔ مشیر خزانہ کو عمران خان سے مسلسل ملاقات نہ کروائے جانے کے خلاف عدالت سے رجوع کرنے کی ہدایات دی گئیں۔ مختلف محکموں اور وزراء کی کارکردگی پر بھی تفصیلی بات ہوئی۔ عمران خان نے وزیراعلی کو اس ضمن میں مکمل اختیار دیتے ہوئے ضروری اقدامات کی ہدایت کی۔ عمران خان نے قانون کی بالادستی اور حقیقی آزادی کی تحریک کو مزید تیز کرنے اور اس سلسلے میں وزیراعلی کو تحریک کے حوالے سے تمام  ضروری اقدامات اٹھانے کیلئے ہدایات دیں۔