جنرل اسمبلی: انڈیا کی طرف سے نام بگاڑنے پر پاکستان کا احتجاج

یو این منگل 30 ستمبر 2025 21:45

اسلام آباد (اُردو پوائنٹ ۔ UN اردو۔ 30 ستمبر 2025ء) اقوام متحدہ کی جنرل اسمبلی کے 80ویں اجلاس میں پاکستان کے مندوب نے کہا ہے کہ انڈیا ناصرف متواتر دہشت گردی کا مرتکب ہو رہا ہے بلکہ علاقائی سطح پر غنڈہ گردی میں بھی ملوث ہے اور اس نے جنوبی ایشیا کو اپنے بالادست عزائم اور انتہاپسندانہ نظریے کا یرغمال بنا رکھا ہے۔

پاکستان کے مندوب نے انڈیا کے مندوب کی جانب سے دیے گئے بیان پر جواب کا حق استعمال کرتے ہوئے کہا ہے کہ ان کی جانب سے کہی گئی بات پاکستان کو بدنام کرنے کی کوشش اور حقائق سے یکسر عاری ہے۔

عالمی برادری انڈیا کا غیرقانونی اور غیرذمہ دارانہ رویہ نظرانداز نہ کرے۔

پاکستانی مندوب نے کہا کہ یہ انتہائی شرمناک ہے کہ انڈیا اقوام متحدہ کے ایک رکن ملک کے نام تک کو بگاڑنے جیسی گھٹیا حرکت پر اتر آیا ہے۔

(جاری ہے)

ایسی زبان نہ تو سنجیدگی ظاہر کرتی ہے اور نہ ہی ذمہ داری بلکہ اس سے انڈیا کی گھٹیا ذہنیت عالمی سطح پر بے نقاب ہو گئی ہے اور یہ ثابت ہوا ہے کہ انڈیا کے پاس طعنہ زنی کے علاوہ پیش کرنے کے لیے کوئی ٹھوس دلیل نہیں ہے۔

انہوں نے کہا کہ خود انڈیا اپنی سرحدوں سے باہر دہشت گرد سرگرمیوں کی حمایت اور سرپرستی میں ملوث پایا گیا ہے۔ اس کے انٹیلیجنس اہلکاروں پر ایسے گروہوں کو مالی معاونت اور ہدایات دینے کے الزامات ہیں جو دنیا بھر میں تخریب کاری اور ٹارگٹ کلنگ میں ملوث ہیں۔ اس طرح انسداد دہشت گردی کے دعووں کے حوالے سے اس کا دوغلا پن ظاہر ہو گیا ہے۔

انڈیا کا بیان

اس سے قبل انڈیا کے مندوب نے جنرل اسمبلی میں کہا تھا کہ یہ بات قابل غور ہے کہ ایک ایسا ہمسایہ جس کا نام نہیں لیا گیا تھا وہ جواب دینے اور اپنی طویل عرصہ سے جاری سرحد پار دہشت گردی کی روش کو تسلیم کرنے پر مجبور ہوا۔

انہوں نے کہا کہ پاکستان کی شہرت خود بولتی ہے کیونکہ مختلف خطوں میں اس کی دہشت گردی کے نشانات واضح ہیں۔ یہ ملک صرف اپنے ہمسایوں کے لیے ہی نہیں بلکہ پوری دنیا کے لیے ایک خطرہ ہے۔

انڈیا کے مندوب کا کہنا تھا کہ کوئی بھی دلیل یا جھوٹ کبھی بھی 'ٹیررستان' کے جرائم پر پردہ نہیں ڈال سکتا۔