صوبائی وزیر سید ذوالفقار علی شاہ سے یونیسکو کے سربراہ کی ملاقات ،سندھ کی ثقافت اور سیاحت کے فروغ پر بات چیت

بدھ 1 اکتوبر 2025 16:05

کراچی (اُردو پوائنٹ اخبارتازہ ترین - اے پی پی۔ 01 اکتوبر2025ء) صوبائی وزیر ثقافت و سیاحت سید ذوالفقار علی شاہ سے یونیسکو پاکستان آفس کے سربراہ فواد پاشایف نے اہم ملاقات کی اورسندھ کی ثقافت اور سیاحت کے فروغ پر تفصیلی بات چیت کی۔بدھ کو جاری اعلامیہ کے مطابق ملاقات میں یونیسکو سربراہ نے سندھ کے تاریخی ورثے کو دنیا کے سامنے لانے پر زور دیتے ہوئے یونیسکو میں شامل ورثوں سمیت نئے ورثوں سازوں پر جاری کام پر تبادلہ خیال کیا۔

ملاقات میں سیاحتی مقامات کو عالمی معیار کے مطابق ڈھالنے کی تجویزبھی زیر غور آئی۔فواد پاشایف نے کہا کہ سندھ کے آثار قدیمہ عالمی سیاحت کے لیے پرکشش ہیں اورسندھ کی ثقافت پوری دنیا میں منفرد شناخت رکھتی ہے۔صوبائی وزیر ثقافت نے یونیسکو کے تعاون کو خوش آئند قرار دیتے ہوئے کہا کہ سندھ حکومت ثقافتی ورثے کے تحفظ کے لیے سنجیدہ اقدامات کر رہی ہے۔

(جاری ہے)

انہوں نے کہا کہ یونیسکو کی معاونت سے سندھ کی تاریخ کو نئی نسل تک پہنچانے کا عزم رکھتے ہیں،ثقافتی سرمایہ کاری سے روزگار کے مواقع بڑھیں گے۔اس موقع پریونیسکو سربراہ نے سندھ حکومت کے اقدامات کو سراہتے ہوئے سندھ حکومت اور یونیسکو کے اشتراک سے عالمی سطح پر ثقافت کو اجاگر کرنے پر اتفاق کیا۔صوبائی وزیر سید ذوالفقار علی شاہ نے مہمانوں کو سندھی اجرک ٹوپی کنگ پریسٹ کی یادگار شیلڈ اور تاریخی ورثوں کی تصاویر تحفہ پیش کی۔