بھارت نے آئی سی سی ویمن ورلڈکپ کو سیاست زدہ کرنے کا منصوبہ بنالیا

ایشیا کپ میں شروع ہونے والا سلسلہ ویمن ورلڈ کپ میں بھی جاری رہے گا، بھارتی صحافی

بدھ 1 اکتوبر 2025 22:55

نئی دہلی (اُردو پوائنٹ اخبارتازہ ترین - این این آئی۔ 01 اکتوبر2025ء) بھارت نے ایشیا کپ کے بعد انٹرنیشنل کرکٹ کونسل (آئی سی سی) ویمن ورلڈ کپ کو بھی سیاست زدہ کرنے کا منصوبہ بنا لیا ہے۔بھارتی صحافی بوریا مجمدار نے سوشل میڈیا پر لکھا ہے کہ ایشیا کپ میں شروع ہونے والا سلسلہ ویمن ورلڈ کپ میں بھی جاری رہے گا۔انہوں نے کہا کہ ویمن ورلڈ کپ میں جو چیز تبدیل ہوگی وہ صرف جنس ہو گی، یعنی مردوں کے بعد اب خواتین کے مقابلے میں بھی وہی سلسلہ چلے گا۔

(جاری ہے)

بھارتی صحافی نے لکھا کہ ویمن ورلڈ کپ میں پاک بھارت میچ میں وہی ہوگا جو ایشیا کپ میں ہوا۔بوریا مجمدار نے اپنے بیان میں دعویٰ کیا کہ ویمن ورلڈ کپ میں پاک بھارت میچ کے موقع پر کھلاڑی ہاتھ نہیں ملائیں گے۔یاد رہے کہ بھارت نے حال ہی میں ہونے والے ایشیا کپ کو بھی سیاست زدہ کرنے کی کوشش کی، بھارتی کھلاڑیوں نے کسی بھی میچ کے دوران پاکستانی کھلاڑیوں سے ہاتھ نہیں ملائے تھے اور پھر ایشیا کپ کا فائنل جیتنے کے بعد بھارتی کپتان نے ایشین کرکٹ کونسل کے چیئرمین محسن نقوی سے ٹرافی بھی وصول نہیں کی تھی۔واضح رہے کہ ویمن ورلڈ کپ میں پاکستان اور بھارت کا میچ 5 اکتوبر کو کھیلا جائے گا۔