Live Updates

اگلی بار ہاتھ ملائیں گے؟، سوال پر بھارتی کپتان کی ہٹ دھرمی برقرار

نہیں جانتا پاکستان کے ساتھ اگلے میچ میں کیا ہوگا ،ابھی تو یہ لمحہ ہے جسے ہم انجوائے کرنا چاہتے ہیں : سوریا کمار یادو

ذیشان مہتاب جمعرات 2 اکتوبر 2025 15:40

اگلی بار ہاتھ ملائیں گے؟، سوال پر بھارتی کپتان کی ہٹ دھرمی برقرار

ممبئی (اردو پوائنٹ تازہ ترین اخبار ۔ 2 اکتوبر 2025ء ) بھارتی کرکٹ ٹیم کے کپتان سوریا کمار یادو نے بھارتی اخبار کو دیئےگئے حالیہ انٹرویو میں ہینڈ شیک تنازع پر اپنی ہٹ دھرمی برقرار رکھتے ہوئے کہا ہے کہ ”میں نہیں جانتا پاکستان کے ساتھ اگلے میچ میں کیا ہوگا ابھی تو یہ لمحہ ہے جسے ہم انجوائے کرنا چاہتے ہیں۔“

بھارتی میڈیا رپورٹس کے مطابق جب 35 سالہ سوریا کمار سے سوال کیا گیا کہ کیا وہ اپنے پاکستان کو کمزور حریف دینے کے بیان پر پچھتا رہے ہیں، تو انہوں نے دونوں ٹیموں کے کھلاڑیوں کی صلاحیتوں کا موازنہ کرتے ہوئے کہا کہ “ بالکل نہیں! اگر یہ فائنل ہوتا تو سخت مقابلہ ہوتا، فائنل ایک موقع ہوتا ہے۔

بھارتی کپتان کا کہنا تھا کہ لوگ کہتے ہیں کہ یہ بس ایک میچ ہے لیکن فائنل تو فائنل ہوتا ہے۔

(جاری ہے)

آپ جانتے ہیں کہ یہ ناک آؤٹ گیم ہے، آپ نے اس کیلئے بہت محنت کی ہوتی ہے۔ دباؤ ضرور ہوتا ہے لیکن میرے ذہن میں کبھی نہیں آیا کہ میں نے کچھ غلط کہا ہے۔ میں اپنی ٹیم کو دیکھتا ہوں، جب وہ پریکٹس کرتے ہیں یا میچ میں کھیلتے ہیں تو مجھے ان کی صلاحیت کا اندازہ ہو جاتا ہے کہ وہ کسی بھی صورتحال میں کھیل سکتے ہیں۔

اسی کو دیکھتے ہوئے میں نے وہ بات کہی تھی۔

واضح رہے سوریا کمار یادو نے ایشیاء کپ 2025ء کے دوران اُس وقت بڑی بحث چھیڑ دی تھی جب انہوں نے پاکستان کے خلاف میچ کے بعد ہونے والی پریس کانفرنس میں کہا تھا کہ وہ اب پاکستان کو سخت حریف نہیں سمجھتے۔ وہیں پاکستانی کپتان سلمان آغاز سے ہاتھ نہ ملانے کے معاملے پر بھارتی کپتان کو کڑی تنقید کا نشانہ بنایا گیا تھا۔

حال ہی میں ایشیا ءکپ ٹورنامنٹ میں انڈیا نے پاکستان کو تین میچز میں شکست دی تھی جن میں اتوار کو کھیلا گیا فائنل بھی شامل تھا۔

گروپ سٹیج اور سپر فور مرحلے کے میچز یکطرفہ ثابت ہوئے، جبکہ فائنل سنسنی خیز مرحلے میں داخل ہوا تھا تاہم جیت بھارت کے حصے میں آئی۔

فائنل میچ میں بھارتی کھلاڑی تلک ورما نے ناقابلِ شکست 69 رنز کی شاندار اننگز کھیل کر پلیئر آف دی میچ کا اعزاز حاصل کیا تھا۔