فخر زمان کا آئی ایل ٹی 20 میں معاہدہ، ایشون کو کسی نے نہیں خریدا

نسیم شاہ اور حسن نواز بھی منتخب ، فخر مسلسل دوسرے سیزن میں ڈیزرٹ وائپرز کی نمائندگی کریں گے

ذیشان مہتاب جمعرات 2 اکتوبر 2025 12:57

فخر زمان کا آئی ایل ٹی 20 میں معاہدہ، ایشون کو کسی نے نہیں خریدا

لاہور (اردو پوائنٹ تازہ ترین اخبار ۔ 2 اکتوبر 2025ء ) پاکستان کے اوپنر بیٹر فخر زمان کو آئی ایل ٹی 20 میں ڈیزرٹ وائپرز نے سائن کرلیا جب کہ سابق بھارتی اسپنر روی چندرن ایشون نیلامی میں فروخت نہیں ہوسکے۔

فخر زمان کو ڈیزرٹ وائپرز نے 80 ہزار ڈالر میں خریدا ہے جبکہ یوا ے ای کے فاسٹ بولر جنید صدیق کو شارجہ واریئرز نے ایک لاکھ 70 ہزار ڈالر کی بھاری رقم کے عوض سائن کیا۔

ڈیزرٹ وائپرز کے ساتھ فخر زمان کا یہ دوسرا سیزن ہے وہ اس سے قبل تیسرے ایڈیشن میں فرنچائز کی نمائندگی کرچکے ہیں۔

انہوں نے 27.75 کی اوسط اور 134.54 کے اسٹرائیک ریٹ سے 222 رنز بنائے جس میں دو نصف سنچریاں شامل تھیں۔

افغانستان کے فاسٹ بولر نوین الحق کو ایم آئی ایمریٹس نے ایک لاکھ ڈالر میں خریدا ہے، پاکستان کے سابق فاسٹ بولر محمد عامر اور انگلش لیجنڈ جیمز اینڈرسن کو کسی نے سائن نہیں کیا۔

(جاری ہے)

پاکستانی وکٹ کیپر بلے باز محمد حارث اور اوپننگ بلے باز صائم ایوب نیلامی میں فروخت نہیں ہوئے جبکہ ویسٹ انڈیز کے ہارڈ ہٹ بلے باز آندرے فلیچر کو ایم آئی ایمریٹس کو 260,000 ڈالر میں فروخت کیا گیا۔

نیلامی کے لیے 20 سے زائد ممالک کے تقریباً 300 کھلاڑی رجسٹرڈ ہیں جن میں مارکی انٹرنیشنل اور کویت اور سعودی عرب کے علاقائی کھلاڑی شامل ہیں۔