پنجاب پرپانی چوری کے الزام کا جواب وزیراعلی نہیں دیں گی تو کون دے گا رانا ثنااللہ

جمعرات 2 اکتوبر 2025 20:45

اسلام آباد (اُردو پوائنٹ اخبارتازہ ترین - این این آئی۔ 02 اکتوبر2025ء)لیگی رہنماء سینیٹر رانا ثنا اللہ نے کہا ہے کہ پنجاب پر پانی چوری کے الزام کا جواب وزیراعلی پنجاب نہیں دیں گی تو کون دے گا وزیراعلی پنجاب عثمان بزدار تو نہیں ہیں۔نجی ٹی وی پروگرام میں گفتگو کرتے ہوئے سینیٹر رانا ثنا اللہ نے کہا کہ پیپلز پارٹی حکومت کا حصہ نہیں لیکن حکومت کو سپورٹ کر رہی ہے، اختلافات کے باوجود دونوں جماعتوں نے اتفاق کیا ہے کہ ایک دوسرے کا احترام کیا جائے گا اور سخت زبان سے گریز کیا جائے گا۔

انہوں نے کہا کہ پیپلز پارٹی اور مسلم لیگ ن دونوں کی اپنی پالیسی، سوچ اور نکتہ نظر ہے اور کوئی ایک دوسرے کی پالیسی کا پابند نہیں۔انہوں نے بتایا کہ ملاقات میں پیپلز پارٹی کی جانب سے پانی کے معاملے پر کچھ تحفظات کا اظہار کیا گیا خاص طور پر یہ سوال اٹھایا گیا کہ میرا پانی، میری مرضی جیسے جملے کیوں کہے گئی ۔

(جاری ہے)

انہوں نے واضح کیا کہ پانی پاکستان کا اجتماعی اثاثہ ہے اور آئینی فارمولا کے تحت اس کی تقسیم ہوتی ہے، وزیراعلی پنجاب مریم نواز نے صرف پنجاب کے حصے کے پانی کی بات کی تھی کسی دوسرے صوبے کے حصے پر کوئی دعوی یا تجاوز نہیں کیا گیا۔

راناثنااللہ نے کہا کہ پنجاب کے پانی کو ہم جہاں استعمال کریں، یہ ہمارا حق ہے، اگر ہم اپنی نہر بنائیں تو یہ آئینی حق کے تحت ہے۔ بینظیر انکم سپورٹ پروگرام کے ڈیٹا پر شدید اعتراضات ہیں ۔ ڈیٹا کی تصدیق کیبعد اس میں تبدیلیاں کرنی چاہئیں۔