Live Updates

پنجاب کی وزیرِ اطلاعات بہت دبائو میں ہیں، مزمل اسلم کا رد عمل

جمعہ 3 اکتوبر 2025 19:25

پشاور (اُردو پوائنٹ اخبارتازہ ترین - این این آئی۔ 03 اکتوبر2025ء)مشیر خزانہ خیبر پختونخوا مزمل اسلم نے وزیرِ اطلاعات پنجاب عظمیٰ بخاری کے بیان پر ردِ عمل کا اظہار کرتے ہوئے کہاہے کہ پنجاب کی وزیرِ اطلاعات بہت دبائو میں ہیں۔پشاور سے جاری کیے گئے بیان میں انہوں نے کہا کہ پنجاب کی وزیرِ اطلاعات بہت دبائو میں ہیں، انہیں اتنا نہیں پتہ کہ ان کا صوبہ 85 فیصد وفاق کی آمدن سے چلتا ہے۔

(جاری ہے)

مزمل اسلم نے کہا کہ پنجاب واقعی ترقی یافتہ صوبہ ہوتا تو الٹا وفاق کو آپ فنڈز دیتے، وفاق کے ذمے خیبر پختونخوا کے ڈھائی ہزار ارب روپے کے واجبات پنجاب کی وجہ سے ہیں۔انہوں نے کہا کہ پنجاب اپنی سستی بجلی اور گیس پر کام کرتا تو وفاق اتنا مجبور نہ ہوتا، پنجاب حکومت اپنے وسائل سے مری ایکسپریس وے بھی نہیں بنا سکتی، مری ایکسپریس وے وفاق کے پیسوں سے این ایچ اے کے ذریعے بنوائی گئی۔مشیر خزانہ خیبر پختونخوا نے کہا کہ پنجاب کے 46 لاکھ لوگ بے نظیر انکم سپورٹ پروگرام سے مستفید ہو رہے ہیں، وزیرِ اعلیٰ پنجاب کو خود داری دکھانی ہے تو اپنے وسائل سے 46 لاکھ سیلاب متاثرین کو معاوضہ دیں۔