Live Updates

ٹیسٹ کرکٹر ابرار احمد گھوڑی چڑھنے کو تیار

قومی ٹیم کے مسٹری سپنر کی اہلیہ ان کے والدین کی پسند ہیں، یہ رشتہ دونوں خاندانوں کی رضامندی سے طے پایا ہے

ہفتہ 4 اکتوبر 2025 10:55

ٹیسٹ کرکٹر ابرار احمد گھوڑی چڑھنے کو تیار

کراچی (اردو پوائنٹ تازہ ترین اخبار ۔ 4 اکتوبر 2025ء ) قومی کرکٹ ٹیم کے نوجوان اسپنر ابرار احمد گھوڑی چڑھنے کو تیار ہیں۔

تفصیلات کے مطابق مختلف سوشل میڈیا پیجز پر گردش کرنے والی خبروں کے مطابق گزشتہ شب 27 سالہ کھلاڑی کی مہندی کی تقریب منعقد ہوئی۔

انسٹاگرام پر ابرار نے سبز شلوار قمیض میں تصویر بھی شیئر کی۔

اس حوالے سے مختلف میڈیا رپورٹس میں دعویٰ کیا جارہا ہے کہ ابرار آج کراچی میں رشتہ ازدواج میں منسلک ہوں گے، ان کا نکاح ہوچکا ہے، وہ آج دلہن گھر لائیں گے جب کہ ان کا ولیمہ 6 اکتوبر کو ہوگا۔

ذرائع کے مطابق ابرار احمد کی اہلیہ ان کے والدین کی پسند ہیں اور یہ رشتہ دونوں خاندانوں کی رضامندی سے طے پایا ہے۔

جلد اپنی زندگی کی نئی اننگز شروع کرنے والے ابرار ایشیا کپ 2025ء ٹورنامنٹ میں اس وقت توجہ کا مرکز بننے جب انہوں نے اور سری لنکا کے کھلاڑی ونیندو ہسارنگا نے وکٹ لینے کے بعد ایک دوسرے کے جشن منانے کا اسٹائل کاپی کیا۔

(جاری ہے)

میچ کے بعد یہ دونوں کھلاڑی ایک دوسرے کے گلے ملتے، ہنسی مذاق اور مصافحہ کرتے بھی دکھائی دیے۔

واضح رہے کہ ابرار احمد 12 اکتوبر سے شروع ہونے والی جنوبی افریقہ کے خلاف ٹیسٹ سیریز کے لیے پاکستان کے اعلان کردہ اسکواڈ میں شامل ہیں۔

انہوں نے پہلی مرتبہ 2017ء میں پی ایس ایل میں کراچی کنگز کی نمائندگی کی، بعد ازاں نوجوان سپنر نے 2022ء میں انگلینڈ کے خلاف ٹیسٹ میچ کے ذریعے ڈیبیو کیا اور اپنی عمدہ پرفارمنس سے انہوں نے پہلے ہی میچ میں 11 وکٹیں لے کر اپنی دھاک بٹھا دی۔