اپنی ریٹائرمنٹ واپس لینے کا کوئی ارادہ نہیں رکھتا،محمد عامر نے بتادیا

پیر 6 اکتوبر 2025 16:38

کراچی (اُردو پوائنٹ اخبارتازہ ترین - این این آئی۔ 06 اکتوبر2025ء) قومی کرکٹ ٹیم کے سابق فاسٹ بولر محمد عامر نے انٹرنیشنل کرکٹ میں ممکنہ واپسی کی خبروں پر خاموشی توڑتے ہوئے واضح کر دیا کہ وہ اپنی ریٹائرمنٹ واپس لینے کا کوئی ارادہ نہیں رکھتے۔ایک ویڈیو پیغام میں محمد عامر نے کہا کہ گزشتہ چند دنوں سے یہ خبریں گردش کر رہی ہیں کہ میں دوبارہ انٹرنیشنل کرکٹ میں واپسی کر رہا ہوں، تاہم ان خبروں میں کوئی صداقت نہیں۔

انہوں نے کہا کہ دو تین دن سے سن رہا ہوں کہ محمد عامر کم بیک کر رہے ہیں اور ریٹائرمنٹ واپس لے رہے ہیں، ایسا کوئی معاملہ نہیں، میری کسی سے واپسی یا ریٹائرمنٹ واپس لینے پر کوئی بات نہیں ہوئی، اور نہ ہی میرا کوئی ایسا ارادہ ہے، میں نے جو فیصلہ کیا تھا وہ حتمی ہے۔

(جاری ہے)

عامر نے مزید کہا کہ اگرچہ مداح چاہتے ہیں کہ میں دوبارہ کھیلوں، مگر پاکستان کرکٹ کو آگے بڑھنے کی ضرورت ہے، نوجوان کھلاڑیوں کو مستقل مواقع ملنے چاہئیں، تب ہی اگلے دو تین سال میں ایک مضبوط ٹیم تیار ہوگی۔

انہوں نے امید ظاہر کی کہ قومی ٹیم جلد ایک بار پھر بڑی کامیابیاں سمیٹے گی، ہم ایشیا کپ فائنل کھیل چکے ہیں، اب امید ہے کہ ہم ورلڈ کپ فائنل بھی کھیلیں اور جیتیں۔محمد عامر نے چیف سلیکٹر کے عہدے پر تبدیلی سے متعلق سرفراز احمد کی بھرپور حمایت کی اور کہا کہ اگر سرفراز احمد چیف سلیکٹر بنتے ہیں یا بطور سلیکٹر آتے ہیں تو یہ ایک بہترین فیصلہ ہوگا، وہ موجودہ کھلاڑیوں کے ساتھ کھیل چکے ہیں، جس سے فائدہ ہو سکتا ہے۔

انہوں نے سرفراز احمد کی دیانت داری کو سراہتے ہوئے کہا کہ سرفراز احمد ایک ایماندار اور مخلص انسان ہیں، پاکستان کرکٹ کو ان جیسے لوگوں کی ضرورت ہے، سابق کرکٹرز کو بھی نظام میں شامل کیا جانا چاہیے، کیونکہ کئی کھلاڑی آئے اور ٹیم کو انتشار میں چھوڑ گئے۔عامر نے مزید تجویز دی کہ تجربہ کار کھلاڑیوں کو کوچنگ اور مشاورتی کرداروں میں استعمال کیا جائے۔

شعیب اختر، عمر گل اور سہیل تنویر کو وائٹ بال کرکٹ کے لیے استعمال کیا جانا چاہیے، ان کے پاس قیمتی تجربہ ہے، یونس خان کو بھی سسٹم کا حصہ بنانا چاہیے، وہ ’یس مین‘ نہیں ہیں۔یاد رہے کہ محمد عامر نے 14 دسمبر 2024ء کو آئی سی سی ٹی ٹوئنٹی ورلڈ کپ کے بعد دوسری مرتبہ انٹرنیشنل کرکٹ سے ریٹائرمنٹ کا اعلان کیا تھا، اس سے قبل وہ دسمبر 2020ء میں ریٹائر ہوئے تھے، بعد ازاں 2024ء کے آغاز میں ٹی ٹوئنٹی ورلڈ کپ کے لیے دستیابی ظاہر کی تھی۔