Live Updates

پی ٹی آئی نے حافظ نعیم کا عمران خان سے متعلق بیان بدنیتی پرمبنی قرار دے دیا

پیر 6 اکتوبر 2025 18:20

اسلام آباد(اُردو پوائنٹ اخبارتازہ ترین - این این آئی۔ 06 اکتوبر2025ء) پاکستان تحریک انصاف نے امیر جماعت اسلامی پاکستان حافظ نعیم الرحمن کے عمران خان سے متعلق بیان کو مضحکہ خیز اور بدنیتی پر مبنی قرار دے دیا۔پی ٹی آئی نے سخت ردعمل دیتے ہوئے کہا کہ ریموٹ کنٹرول سیاستدانوں کی عقل پر ماتم ہی کیا جا سکتا ہے، حافظ نعیم کا بیان اسٹیبلشمنٹ کی خوشنودی کی کوشش ہے۔

ترجمان پی ٹی آئی نے کہا کہ حافظ نعیم ایک قید عوامی لیڈر کے ایمان و غیرت پر تبصرہ کر رہے ہیں، یہ بیان سیاسی بدنیتی اور فکری غلامی کی انتہا ہے۔حافظ نعیم کے بیان پر ترجمان نے کہا کہ چند ماہ قبل پی ٹی آئی نے جماعت اسلامی کے فلسطین مارچ کی غیر مشروط حمایت کی تھی۔ترجمان نے وضاحت کی کہ بانی پی ٹی آئی فلسطین پر سب سے واضح اور جرات مندانہ موقف رکھتے ہیں، عمران خان نے ہمیشہ اسرائیل اور غلام حکمرانوں کے خلاف دوٹوک موقف اپنایا، تحریک انصاف کے بیانات دراصل عمران خان کے موقف کی ترجمانی کرتے ہیں۔

(جاری ہے)

پی ٹی آئی کے ترجمان نے سوال اٹھایا کہ حافظ نعیم صاحب!کیا آپ کو سینیٹر مشتاق احمد کیلئے بولنے کی اجازت نہیں ملی جو اسرائیلی قید میں ہیں، ان کیلئے آپ کی زبان کیوں بند ہی نواز شریف کی خاموشی پر بھی کبھی سوال کر لیجیے۔ترجمان کے مطابق قوم جانتی ہے ریموٹ کنٹرول سیاستدان کب اور کس کے اشارے پر بولتے ہیں، حافظ نعیم اداروں کی خدمت جاری رکھیں مگر عمران خان پر زبان نہ چلائیں۔