ٓسعودی شوریٰ کونسل کا اعلیٰ سطح وفد پاکستان پہنچ گیا، اسپیکر قومی اسمبلی کا پرتپاک استقبال

ئ*پاکستان اور سعودی عرب کے مابین پارلیمانی تعلقات کے فروغ کے لیے اہم ملاقاتیں متوقع

پیر 6 اکتوبر 2025 21:25

۔اسلام آباد (اُردو پوائنٹ اخبارتازہ ترین - آن لائن۔ 06 اکتوبر2025ء) پاکستان اور سعودی عرب کے مابین تاریخی اور برادرانہ تعلقات کو مزید مستحکم کرنے کے لیے سعودی شوریٰ کونسل کا اعلیٰ سطح پارلیمانی وفد پاکستان پہنچ چکا ہے۔ یہ وفد اسپیکر قومی اسمبلی سردار ایاز صادق کی خصوصی دعوت پر اسلام آباد آیا ہے، جہاں ان کا پرتپاک استقبال کیا گیا۔ سعودی وفد کی قیادت سعودی شوریٰ کونسل کے چیئرمین ڈاکٹر عبداللہ بن محمد بن ابراہیم آل الشیخ کر رہے ہیں، جو اپنے وفد کے ہمراہ پاکستان کے پارلیمانی رہنماؤں سے ملاقاتوں کے لیے آئے ہیں۔

اسلام آباد پہنچنے پر اسپیکر قومی اسمبلی سردار ایاز صادق نے سعودی وفد کا خوش آمدید کہا، اور اس موقع پر سعودی عرب کے سفیر نواف سعید المالکی بھی موجود تھے۔

(جاری ہے)

سعودی وفد کا دورہ پاکستان دونوں ممالک کے تاریخی اور برادرانہ تعلقات کی عکاسی کرتا ہے، جو باہمی احترام، عقیدے اور علاقائی خوشحالی کے وڑن پر مبنی ہیں۔سعودی وفد کے دورے کے دوران کئی اہم ملاقاتیں متوقع ہیں۔

سعودی وفد صدرِ مملکت آصف علی زرداری، وزیرِ اعظم شہباز شریف اور آرمی چیف فیلڈ مارشل جنرل سید عاصم منیر سے ملاقات کرے گا، جہاں دوطرفہ تعلقات، پارلیمانی تعاون، اور علاقائی امن و ترقی پر تبادلہ خیال کیا جائے گا۔ اس دورے کا مقصد پاکستان اور سعودی عرب کے درمیان پارلیمانی تعلقات کو مزید فروغ دینا ہے اور دونوں ممالک کے مابین قریبی روابط کی بنیاد کو مزید مستحکم کرنا ہے۔

سعودی وفد کے پاکستان پہنچنے کے موقع پر پارلیمنٹ ہاؤس کو سبز روشنیوں سے سجا دیا گیا ہے، جو سعودی عرب کے ساتھ محبت اور اخوت کی علامت ہے۔ پارلیمنٹ ہاؤس کا سبز رنگ دونوں ممالک کے مابین گہری دوستی اور تعلقات کو ظاہر کرتا ہے۔پاکستان اور سعودی عرب کے تعلقات ہمیشہ سے ہی برادرانہ اور دوستانہ رہے ہیں، اور دونوں ممالک کا ایک دوسرے کے ساتھ مسلسل تعاون مختلف شعبوں میں جاری رہا ہے۔ سعودی عرب کے ساتھ پارلیمانی سطح پر تعاون مزید بڑھانے کے لیے یہ دورہ ایک اہم قدم ثابت ہو گا