افغان فٹ بال ٹیم کے ویزوں کا مسئلہ حل کرانے کیلئے کوشاں ہیں، شاہد کھوکھر

منگل 7 اکتوبر 2025 17:33

لاہور(اُردو پوائنٹ اخبارتازہ ترین - این این آئی۔ 07 اکتوبر2025ء) پاکستان فٹ بال فیڈریشن (پی ایف ایف) کے قائمقام سیکریٹری شاہد کھوکھر نے کہا ہے کہ فیڈریشن افغان ٹیم کے ویزوں کا مسئلہ حل کرانے کیلیے کوشاں ہے۔ایک بیان میں شاہد کھوکھر نے کہا کہ پاکستان اور افغانستان کے درمیان فٹ بال کا کوالیفائر مرحلے کا میچ کھیل کی ترقی کے لیے اہم ہے۔انہوں نے مزید کہا کہ امید ہے افغان فٹ بال ٹیم کے ویزوں کا مسئلہ جلد حل ہوجائے گا۔

ذرائع کے مطابق اے ایف سی ایشین کپ کوالیفائر میچ کیلیے افغان ٹیم کو تاحال پاکستان کے ویزے جاری نہیں ہوسکے ہیں۔پاکستان اور افغانستان کی ٹیموں کے درمیان میچ 9 اکتوبر کو اسلام آباد میں شیڈول ہے، رولز کے تحت افغان ٹیم کو میچ سے 2 روز قبل یعنی کل 7 اکتوبر تک اسلام آباد پہنچنا ہے۔

(جاری ہے)

ذرائع کے مطابق ویزوں کے اجراء میں تاخیر کی وجہ سے افغانستان کی فٹ بال ٹیم کا پروگرام غیر یقینی صورتحال کا شکار ہوگیا ہے۔

پی ایف ایف ذرائع کے مطابق افغانستان فٹ بال ٹیم نے کابل سفارتخانے میں 25 تا 27 ستمبر کے درمیان درخواستیں دیں لیکن کابل میں انٹرنیٹ بلیک آو?ٹ کی وجہ سے کمیونیکیشن کا عمل تاخیر کا شکار رہا ہے۔ذرائع کے مطابق پی ایف ایف کو افغان فیڈریشن سے اکتوبر کے پہلے ہفتے میں ویزا ریفرنس نمبر ملے، جس کے بعد فیڈریشن نے متعلقہ حکام کو پراسیس فاسٹ ٹریک کرنے کی درخواست کی۔ذرائع پی ایف ایف کے مطابق پر امید ہیں کہ منگل کی صبح تک افغانستان کی فٹ بال ٹیم کو پاکستان کے ویزے مل جائیں گے۔