کے الیکٹرک کو پرانے واجبات کی وصولی کی اجازت کا معاملہ،درخواست کی سماعت غیر معینہ مدت تک کے لیے ملتوی

منگل 7 اکتوبر 2025 15:59

کراچی (اُردو پوائنٹ اخبارتازہ ترین - این این آئی۔ 07 اکتوبر2025ء) سندھ ہائی کورٹ نے نیپرا کی جانب سے کے الیکٹرک کو پرانے واجبات کی وصولی کی اجازت کا معاملہ سے متعلق درخواست کی سماعت ایم کیو ایم کے وکیل کی عدم حاضری کے باعث غیر معینہ مدت تک کے لیے ملتوی کردی ہے ۔سندھ ہائی کورٹ میں ایم کیو ایم کے رکن سندھ اسمبلی عامر صدیقی کی نیپرا کے ایس آر او کے خلاف درخواست کی سماعت ہوئی ۔

عدالت نیایم کیوایم کے وکیل کی عدم حاضری کے باعث سماعت غیر معینہ مدت تک ملتوی کردی ۔عدالت نے کے الیکٹرک کے خلاف درخواست قابل سماعت ہونے پر درخواست گزار کے وکیل سے دلائل طلب کر رکھے ہیں۔درخواست گزار نے موقف اختیار کیا ہے کہ نیپرا نے کے الیکٹرک کو 2017 سے 2023 کے دوران بجلی چوری و دیگر واجبات کی وصولی کی اجازت دی۔

(جاری ہے)

کے الیکٹرک کو گذشتہ واجبات کو بل ادا کرنے والے صارفین سے وصولی کی اجازت دی ہے۔

کے الیکٹرک کو نظام کی بہتری کے لئے وفاقی اور صوبائی حکومت مالی معاونت فراہم کرتے ہیں۔نیپرا نے کے الیکٹرک کو سال 2023-24 کے دوران آپریشن اور مرمت کی مد میں پانچ ارب 91 کروڑ روپے وصولی کی اجازت دی تھی۔کے الیکٹرک کو اگلے سات برسوں کے دوران مزید 41 ارب 37 کروڑ سے زائد کی وصول کی اجازت دی گئی ہے۔کے الیکٹرک کے واجبات کا بوجھ بل ادا کرنے والے صارفین پر منتقل کردیا گیا ہے۔

کے الیکٹرک کی نااہلی اور بدانتظامی کے باعث ہونے والے نقصان کو صارفین پر ڈالنے کی اجازت نہیں دی جاسکتی۔کے الیکٹرک کی جانب سے عدم ادائیگی یا غیر قانونی کنکشنز کے خلاف کارروائی کے بجائے صارفین پر زائد بل، سرچارج اور اضافی لوڈ شیڈنگ نافذ کیا جاتا ہے۔عدالت سے استدعا ہے کہ کے الیکٹرک کے نقصان کو صارفین سے وصولی کی اجازت کو غیر قانونی قرار دیا جائے۔نیپرا کو کے الیکٹرک کو ملٹی ایئر ٹیرف فریم ورک پر سختی سے عملدرآمد کا حکم دیا جائے جائے۔