چیئرمین سینیٹ سید یوسف رضا گیلانی 68ویں دولتِ مشترکہ پارلیمانی کانفرنس میں شرکت کیلئے بارباڈوس پہنچ گئے

منگل 7 اکتوبر 2025 23:03

بارباڈوس(اُردو پوائنٹ اخبارتازہ ترین - این این آئی۔ 07 اکتوبر2025ء) چیئرمین سینیٹ سید یوسف رضا گیلانی 68ویں دولتِ مشترکہ پارلیمانی کانفرنس میں شرکت کے لیے بارباڈوس پہنچ گئے۔منگل کوسینیٹ سیکرٹریٹ سے جاری بیان کے مطابق سید یوسف رضا گیلانی برطانیہ میں مختصر قیام کے بعد دولتِ مشترکہ پارلیمانی کانفرنس(سی پی سی68) میں شرکت کے لیے بارباڈوس پہنچ گئے ہیں۔

کانفرنس میں دولتِ مشترکہ کے رکن ممالک کے پارلیمانوں کے سربراہان، اراکینِ پارلیمان اور نمائندگان بڑی تعداد میں شریک ہیں،یہ کانفرنس جمہوری اقدار، قانون کی حکمرانی، شفاف طرزِ حکمرانی، پارلیمانی تعاون اور عوامی روابط کے فروغ کے حوالے سے اہم بین الاقوامی فورم کی حیثیت رکھتی ہے۔چیئرمین سینیٹ کانفرنس کے دوران مختلف ممالک کے پارلیمانی رہنماؤں سے اہم دوطرفہ ملاقاتیں بھی کریں گے جن میں پارلیمانی سطح پر شراکت داری، عوامی روابط کے فروغ، خطے میں امن و استحکام، تجارتی تعاون اور ماحولیاتی چیلنجز جیسے موضوعات پر تبادلہ? خیال کیا جائے گا۔

(جاری ہے)

سید یوسف رضا گیلانی کانفرنس کے ایک اہم سیشن کی صدارت بھی کریں گے۔ اس موقع پر وہ موسمی تغیرات کے اثرات، پاکستان میں حالیہ بارشوں اور سیلابوں سے پیدا ہونے والی انسانی و ماحولیاتی صورتحال اور قدرتی آفات سے نمٹنے کے لیے بین الاقوامی سطح پر مشترکہ اقدامات کی ضرورت پر بھی روشنی ڈالیں گے۔انہوں نے اس امید کا اظہار کیا ہے کہ دولتِ مشترکہ پارلیمانی ایسوسی ایشن (سی پی ای) کے تحت ہونے والی یہ کانفرنس رکن ممالک کے درمیان جمہوری اداروں کے استحکام، قانون کی بالادستی، اور عوامی فلاح و بہبود کے لیے پارلیمانی تعاون کو مزید مضبوط بنانے میں اہم کردار ادا کرے گی۔