جموں و کشمیر، راجوری و کپواڑہ میں بھارتی فوجیوں کی محاصرے اورتلاشی کی کارروائیاں جاری،علاقے میں خوف و ہراس

بدھ 8 اکتوبر 2025 11:54

جموں (اُردو پوائنٹ اخبارتازہ ترین - اے پی پی۔ 08 اکتوبر2025ء) بھارت کے غیر قانونی زیر تسلط جموں وکشمیر میں بھارتی فوجیوں نے ضلع راجوری میں بڑے پیمانے پر محاصرے اور تلاشی کی کارروائی شروع کی جس سے پورے علاقے میں خوف وہراس پھیل گیا ۔کشمیر میڈیا سروس کے مطابق بھارتی فوج، پیراملٹری سینٹرل ریزرو پولیس فورس اورپولیس کے سپیشل آپریشنزگروپ نے منگل کی شام کوبیرنتھوب کے علاقے میں مشترکہ طور پر کارروائی شروع کی جو آج مسلسل دوسرے روز بھی جاری رہی۔

انسپکٹر جنرل آف پولیس جموں زون بی ایس ٹوٹی نے دعویٰ کیا کہ علاقے میں فائرنگ کا تبادلہ ہوا ہے۔ بھارتی فورسز نے تمام داخلی اور خارجی راستوں کو سیل کرکے گھر گھر تلاشی شروع کی۔ پورا علاقہ محاصرے میں ہے ، بھاری تعداد میں بھارتی فورسز کو تعینات کیا گیا جبکہ ڈرونز کا بھی استعمال کیاجارہا ہے۔

(جاری ہے)

دریں اثنا بھارتی فورسز نے ضلع کپواڑہ کے علاقے وارسن میں بھی محاصرے اور تلاشی کی کارروائی شروع کی ہے۔

ایک سینئر پولیس افسر نے دعویٰ کیا کہ تلاشی کے دوران اسلحے اور گولہ بارود کا ایک ذخیرہ برآمد ہوا ہے۔ قابض حکام لوگوں کے گھروں پر چھاپوں کا جواز پیش کرنے کے لئے اکثر اس طرح کے دعوے کرتے ہیں۔ مقامی لوگوں کا کہنا ہے کہ فوجیوں نے کئی گھروں میں گھس کر خواتین اور بچوں سمیت مکینوں کو ہراساں کیا، یہ کارروائیاں غیر قانونی سرگرمیوں کی روک تھام کے کالے قانون یواے پی اے کے تحت کی گئیں۔