پولیو کا خاتمہ قومی ذمہ داری ،انسداد پولیو مہم میں شفافیت اور موثر عمل درآمد کو ہر صورت یقینی بنایا جائے، وفاقی وزیر سید مصطفیٰ کمال

بدھ 8 اکتوبر 2025 20:10

اسلام آباد (اُردو پوائنٹ اخبارتازہ ترین - اے پی پی۔ 08 اکتوبر2025ء) وفاقی وزیر صحت سید مصطفیٰ کمال نے کہا ہے کہ پولیو کا خاتمہ صرف حکومتی نہیں بلکہ قومی ذمہ داری ہے ، انسدادپولیو مہم میں شفافیت اور موثر عمل درآمد کو ہر صورت یقینی بنایا جائے تاکہ پاکستان کو پولیو فری ملک بنانے کا ہدف جلد از جلد حاصل کیا جا سکے۔ان خیالات کا اظہار انہوں نے پولیو کے خاتمے اور معمول کی حفاظتی ویکسینیشن سے متعلق اہم اجلاس کے دوران اظہارخیال کرتے ہوئے کیا۔

اجلاس کے دوران سالانہ پولیو بجٹ کی کل لاگت، مالی پہلوئوں اور عملی حکمت عملیوں کا تفصیلی جائزہ لیا گیا۔ موجودہ ویکسینیشن مہم کی کارکردگی کا بھی مکمل تجزیہ بھی اجلاس میں پیش کیا گیا۔اس موقع پر انہوں نے کہا کہ پولیو کا خاتمہ صرف حکومتی نہیں بلکہ قومی ذمہ داری ہے۔

(جاری ہے)

انہوں نے کہا کہ ہر بچے تک ویکسین کی رسائی یقینی بنانے کے لیے عالمی شراکت داروں کے تعاون سے موثر حکمت عملی اختیار کی جائے گی۔

اجلاس میں پولیو سے ہر بچے کو محفوظ رکھنے کے اقدامات اور درپیش چیلنجز پر تفصیل سے بات چیت کی گئی جبکہ معمول کی حفاظتی ویکسینیشن کو فروغ دینے کی ضرورت پر زور دیا گیا۔وفاقی وزیر صحت نے متعلقہ تمام اداروں کو ہدایت کی کہ انسدادپولیو مہم میں شفافیت اور موثر عمل درآمد کو ہر صورت یقینی بنایا جائے تاکہ پاکستان کو پولیو فری ملک بنانے کا ہدف جلد از جلد حاصل کیا جا سکے۔

اجلاس میں قومی اور بین الاقوامی اداروں کے اعلیٰ حکام اس کے علاوہ عالمی ادارہ صحت (ڈبلیو ایچ او)، یونیسیف اور گاوی کے نمائندگان نے بھی شرکت کی اور ویکسینیشن منصوبوں پر تبادلہ خیال کیا۔اجلاس میں سیکریٹری صحت، ایڈیشنل سیکریٹری، ڈائریکٹر جنرل ہیلتھ، ڈائریکٹر جنرل (ایف ڈی آئی) اور نیشنل ایمرجنسی آپریشن سینٹر (این ای او سی) کے نیشنل کوآرڈینیٹر شریک ہوئے۔