سابق وزیراعلی سندھ سید قائم علی شاہ کے وژن کا عالمی اعتراف، خیرپور اسپیشل اکنامک زون کو ایشیا پیسیفک کے نمایاں صنعتی زونز میں شامل کرلیاگیا

خیرپور اسپیشل اکنامک زون نے بین الاقوامی سطح پر وہ مقام حاصل کیا ہے جو چین، ویتنام، انڈونیشیا اور ملائیشیا کے صنعتی زونز کے شانہ بشانہ ہے،مراد علی شاہ

جمعہ 10 اکتوبر 2025 15:20

کراچی/خیرپور(اُردو پوائنٹ اخبارتازہ ترین - این این آئی۔ 10 اکتوبر2025ء) سابق وزیراعلی سندھ سید قائم علی شاہ کے وژن کا عالمی اعتراف خیرپور اسپیشل اکنامک زون کو ایشیا پیسیفک کے نمایاں صنعتی زونز میں شامل کرلیاگیاہے۔تفصیلات کے مطابق خیرپور اسپیشل اکنامک زون، جو سابق وزیراعلی سندھ سید قائم علی شاہ کے دورِ حکومت میں منصوبہ بندی کے مرحلے میں آیا، اب عالمی سطح پر پاکستان کے لیے اعزاز بن گیا ہے۔

ایف ڈی آئی میگزین کے "گلوبل فری زونز آف دی ایئر 2025 ایوارڈز" میں خیرپور اسپیشل اکنامک زون کو ایشیا پیسیفک کے نمایاں صنعتی زونز میں شامل کیا گیا ہے۔وزیراعلی سندھ سید مراد علی شاہ نے اس کامیابی کو پاکستان کے لیے باعثِ فخر قرار دیتے ہوئے کہا کہ یہ عالمی ایوارڈ سندھ کے صنعتی سفر میں ایک سنگِ میل کی حیثیت رکھتا ہے۔

(جاری ہے)

مراد علی شاہ نے کہاکہ خیرپور اسپیشل اکنامک زون نے بین الاقوامی سطح پر وہ مقام حاصل کیا ہے جو چین، ویتنام، انڈونیشیا اور ملائیشیا کے صنعتی زونز کے شانہ بشانہ ہے۔

انہوں نے کہا کہ یہ اعتراف سندھ حکومت کی پائیدار صنعتی ترقی اور جامع معاشی وژن کا مظہر ہے۔سندھ اکنامک زونز مینجمنٹ کمپنی کی کاوشوں کو عالمی سطح پر سراہا جانا سندھ کی صنعتی پالیسی کی کامیابی کا ثبوت ہے۔وزیراعلی سندھ کے مطابق، خیرپور اسپیشل اکنامک زون روزگار، برآمدات اور سرمایہ کاری کے نئے امکانات کی علامت ہے۔انہوں نے کہا کہ سندھ تیزی سے پاکستان کی صنعتی تبدیلی میں ایک نمایاں قوت کے طور پر ابھر رہا ہے۔مراد علی شاہ نے مزید کہا کہ صوبائی حکومت علاقائی تجارت کے فروغ اور ویلیو ایڈیڈ مینوفیکچرنگ کے ذریعے برآمدی بنیاد کو مضبوط بنا رہی ہے تاکہ معیاری روزگار کے زیادہ سے زیادہ مواقع پیدا کیے جا سکیں۔