برمنگھم : کل جماعتی اجلاس کے شرکاء کا مقبوضہ کشمیر میں انسانی حقوق کی خلاف ورزیوں پراظہار تشویش

اکتوبر کو لندن میں بھارتی ہائی کمیشن کے باہر احتجاج کی کال

جمعہ 10 اکتوبر 2025 17:52

برمنگھم(اُردو پوائنٹ اخبارتازہ ترین - این این آئی۔ 10 اکتوبر2025ء) آل پارٹیز انٹرنیشنل کشمیر کوآرڈینیشن کمیٹی کے صدر فہیم کیانی کی سربراہی میں برمنگھم میں کل جماعتی اجلاس منعقد کیاگیا۔ کشمیرمیڈیاسروس کے مطابق اجلاس میں مختلف سیاسی، مذہبی اور سماجی تنظیموں کے سینئر نمائندوں اور رہنماں نے شرکت کی ۔اجلاس کے شرکا نے بھارت کے غیر قانونی طور پرزیرقبضہ جموں و کشمیر کی موجودہ سنگین صورتحال اور حریت رہنمائوںاور کارکنوں کی مسلسل غیر قانونی نظربندی پر سخت تشویش کا اظہار کیا۔

انہوں نے کہاکہ مقبوضہ علاقے میں تعینات دس لاکھ سے زائد بھارتی قابض افواج نے کشمیری عوام کے تمام بنیادی سیاسی اور انسانی حقوق کوسلب کر رکھا ہے ۔اجلاس میں مقبوضہ کشمیرمیں جاری انسانی حقوق کی خلاف ورزیوں، ماورائے عدالت قتل اور جبری گمشدگیوں پر افسوس کا اظہار کیا۔

(جاری ہے)

اس موقع پر پر جموں و کشمیر پر بھارت کے غیر قانونی فوجی قبضے کے خلاف 27اکتوبر کو لندن میں بھارتی ہائی کمیشن کے باہر احتجاجی مظاہرہ کرنے کا فیصلہ کیاگیا۔

مظاہرے میں اقوام متحدہ، برطانوی حکومت اور عالمی برادری سے مقبوضہ علاقے میں بھارتی مظالم کے خاتمے اور کشمیری عوام کوانکا حق خودارادیتدلانے کیلئے اقوام متحدہ کی متعلقہ قراردادوں پر عمل درآمدکیلئے بھارت پر دبائو بڑھانے کامطالبہ بھی کیاجائے گا۔اجلاس میں حریت رہنمائوں مسرت عالم بٹ، شبیر شاہ، یاسین ملک، آسیہ اندرابی ، ڈاکٹر عبدالحمید فیاض اوردیگر کی مسلسل غیر قانونی نظربندی کی شدید مذمت کی گئی۔

اجلاس سے مفتی فضل احمد قادری، فاروق القادری، مولانا طارق مسعود، چوہدری شکیل، زوہیب صادق، واجد برکی، شہریار کیانی، خواجہ سلیمان، ارم طاہر، نعیم کاکڑ، افتخار جگنو اور دیگر نے خطاب کیا اور کشمیریوں کی پرامن جدوجہد آزادی کی بھرپور حمایت جاری رکھنے کے عزم کا اعادہ کیا۔