پاکستان کرکٹ بورڈ (پی سی بی) نے شائقین کرکٹ کے لیے اپنا پہلا لائیو اسٹریمنگ پلیٹ فارم ’’پی سی بی لائیو‘‘ متعارف کرا دیا

جمعہ 10 اکتوبر 2025 20:20

اسلام آباد (اُردو پوائنٹ اخبارتازہ ترین - اے پی پی۔ 10 اکتوبر2025ء) پاکستان کرکٹ بورڈ (پی سی بی) نے شائقین کرکٹ کے لیے اپنا پہلا لائیو اسٹریمنگ پلیٹ فارم ’’پی سی بی لائیو‘‘ متعارف کرا دیا ہے جس کا مقصد دنیا بھر کے کرکٹ مداحوں کو میچز دیکھنے کی جدید اور آسان سہولت فراہم کرنا ہے۔ ’’پی سی بی لائیو‘‘ دراصل کرکٹ بورڈ کی پہلی او ٹی ٹی سروس ہے جو ابتدائی مرحلے میں برطانیہ میں مقیم شائقین کے لیے دستیاب ہو گی۔

برطانوی صارفین پلیٹ فارم تک رسائی حاصل کرنے کے لیے https://live.pcb.com.pk/ پر رجسٹریشن کرا سکتے ہیں۔ پی سی بی کے مطابق یہ سروس بتدریج دنیا کے دیگر خطوں میں بھی متعارف کرائی جائے گی تاکہ عالمی سطح پر پاکستانی کرکٹ کے شائقین کو بہترین نشریاتی تجربہ فراہم کیا جا سکے۔

(جاری ہے)

او ٹی ٹی پلیٹ فارم پر سب سے پہلی لائیو سیریز پاکستان اور جنوبی افریقہ کے درمیان کھیلی جانے والی سیریز ہو گی جب کہ اکتوبر کے آخری ہفتے میں ’’پی سی بی لائیو‘‘ کی موبائل ایپلیکیشن بھی لانچ کر دی جائے گی۔

اس کے بعد شائقین اپنے موبائل فونز اور دیگر اسمارٹ ڈیوائسز پر بھی براہ راست میچز دیکھ سکیں گے۔ ’’پی سی بی لائیو‘‘ کے ذریعے پاکستانی کرکٹ ٹیموں کے تمام بین الاقوامی میچز، جن میں ٹیسٹ، ون ڈے اور ٹی 20 انٹرنیشنل شامل ہیں، براہ راست نشر کیے جائیں گے۔ اس کے علاوہ پاکستان سپر لیگ (پی ایس ایل) سمیت منتخب ڈومیسٹک مقابلے بھی نشر ہوں گے۔ پلیٹ فارم پر صارفین کو پی سی بی کے آرکائیو مواد، کھلاڑیوں کے خصوصی انٹرویوز، دستاویزی فلموں اور تازہ اپڈیٹس تک بھی رسائی حاصل ہو گی۔ پاکستان کرکٹ بورڈ کے مطابق ’’پی سی بی لائیو‘‘ شائقین کرکٹ کو گھر بیٹھے اعلیٰ معیار کی نشریات فراہم کرنے کی سمت ایک اہم قدم ہے۔